АҚШ Президенти Доналд Трамп Венесуэла раҳбари Николас Мадуро махсус ҳарбий амалиёт натижасида қўлга олинганини ва АҚШга олиб келинганини маълум қилди. У ҳозирда Нью-Йоркда ҳибсда сақланмоқда ва унга нисбатан гиёҳванд моддалар савдоси билан боғлиқ айбловлар қўйилган. Трамп бу ҳаракатни Венесуэладаги сиёсий инқирозни тўхтатиш мақсадида амалга оширилганини билдирди.
Президент Трампнинг айтишича, АҚШ Венесуэлани хавфсиз сиёсий ўтиш давригача вақтинча бошқаради. Унинг таъкидлашича, мамлакатдаги нефт инфратузилмаси қайта тикланади ва иқтисодий барқарорликни таъминлашга ҳаракат қилинади. Трамп АҚШ зарур бўлса, Венесуэлада ҳарбий куч сақлашдан ҳам чўчимаслигини айтди.
Венесуэлада эса Мадуронинг яқин ҳамкорлари унинг қўлга олиниши ноқонуний эканини таъкидлаб, АҚШни мамлакат суверенитетини бузишда айбламоқда. Шу билан бирга, аҳоли орасида ноаниқлик кучайиб, айрим ҳудудларда хавфсизлик чоралари кучайтирилган. Мамлакатда вақтинчалик ҳокимият масаласи ҳануз баҳсли бўлиб қолмоқда.
Халқаро ҳамжамият АҚШнинг бу ҳаракатига турлича муносабат билдирмоқда. БМТ ва айрим давлатлар халқаро ҳуқуққа риоя қилиш зарурлигини таъкидлади. Венесуэладаги вазият эса яқин кунларда минтақавий ва глобал сиёсатда муҳим муҳокама мавзуси бўлиб қолиши кутилмоқда.
“Zamin”ни Telegram'да ўқинг!
