АҚШ Президенти Доналд Трамп маъмурияти Венесуэла билан нефт бўйича келишувга эришилганини эълон қилди. Унга кўра, АҚШ Венесуэладан 50 миллион баррелгача хом нефт импорт қилиши мумкин. Ушбу қарор глобал бозорда нефт таклифи ошишига олиб келиши кутилмоқда ва бунинг ортидан жаҳон нефт нархлари қарийб 1 фоизга пасайди.
Мазкур келишув АҚШнинг Венесуэла нефт саноатини қайта ишга туширишга қаратилган сиёсатининг бир қисми ҳисобланади. Президент Трампнинг айтишича, сотувдан тушган маблағлар АҚШ назорати остида бўлади ва улар Венесуэла ҳамда АҚШ манфаатлари йўлида сарфланади.
Венесуэла нефтининг йирик харидорларидан бири бўлган Хитой ушбу келишувни танқид қилди. Хитой Ташқи ишлар вазирлиги АҚШни Венесуэла ички ишларига аралашишда айблаб, буни халқаро ҳуқуққа зид ҳаракат деб баҳолади. Таҳлилчиларга кўра, Хитой келгусида нефт импортини бошқа давлатлар, жумладан Россия ва Эрондан кўпайтириши мумкин.
Шу билан бирга, Венесуэладаги сиёсий вазият ҳам мураккаблигича қолмоқда. Собиқ президент Николас Мадуро қўлга олинган бўлса-да, унинг иттифоқчилари ҳокимиятда сақланиб қолган. АҚШ эса ҳозирча сиёсий ислоҳотлардан кўра, нефт саноатини тиклаш ва минтақада барқарорликни таъминлашга устувор аҳамият қаратмоқда.
“Zamin”ни Telegram'да ўқинг!
