Ҳуқуқ-тартибот идоралари товламачилик ва зўравонлик билан шуғулланган жиноий гуруҳ фаолиятига чек қўйди. Тергов тахминига кўра, гуруҳни Наманган шаҳрида яшовчи, аввал ҳам бир неча бор судланган шахс ташкил этган. Бу ҳақда podrobno.uz хабар беради.
ИИВ матбуот хизмати маълумотига кўра, 27 ёшли гумонланувчи Баҳриддин Насриддинов (лақаби — Эшон) илгари фирибгарлик, безорилик ва ҳужжатларни қалбакилаштириш билан боғлиқ жиноятлар учун судланган. Тергов версиясига кўра, у пул можароларини куч ишлатиб “ҳал қилиш” ва қарзларни ундириш билан шуғулланувчи уюшган гуруҳ тузган.
Ҳолатлардан бирида гуруҳ аъзолари танишини калтаклаб, танасига пичоқ билан жароҳатлар етказгани айтилмоқда. Мазкур эпизод юзасидан безорилик моддаси билан жиноят иши қўзғатилган. Ушбу модда 5 йилгача озодликдан маҳрум этиш жазосини назарда тутади.
ИИВ ушбу гуруҳ хатти-ҳаракатларидан жабрланган бўлиши мумкин бўлган фуқароларни 102 рақамига қўнғироқ қилиш ёки энг яқин ички ишлар бўлимига мурожаат этишга чақирди.
Аввалроқ Андижонда ИИВ ва ДХХ ходимлари ўзини ҳуқуқ-тартибот идоралари вакили сифатида кўрсатиб, қурол ва ўткир буюмлар билан таҳдид қилган ҳолда фуқаролардан криптовалюта ҳамда мулкни товламачилик йўли билан талаб қилган гуруҳ фаолиятини тўхтатгани хабар қилинганди. Иш бўйича икки гумонланувчи мамлакатдан чиқиб кетгани ва қидирувга берилгани айтилган.
“Zamin”ни Telegram'да ўқинг!
