Шимолий Корея раҳбари Ким Чен Ин Корея Меҳнат партиясининг тўққизинчи съездига бағишланган ҳарбий парадда Жанубий Корея билан мулоқот қилишга ҳам қизиқмаслигини ва зарур бўлса, қўшнисини тўлиқ йўқ қилишга тайёр эканлигини маълум қилди. Бу ҳақда Yonhap News Agency хабар берди.
Парадда Ким Чен Ин АҚШ билан муносабатларни яхшилаш учун Вашингтон Шимолий Кореянинг Конституцияда белгиланган мақомини ҳурмат қилиши ва душманлик сиёсатидан воз кечиши кераклигини таъкидлади. Унинг сўзларига кўра, бу икки давлат ўртасида дўстона алоқаларни шакллантириши мумкин.
Шимолий Корея раҳбари ёрдамчиларига ядровий салоҳиятни мустаҳкамлаш ва янги қурол тизимларини ишлаб чиқиш бўйича топшириқ берди. У сув остида учириладиган қитъалараро баллистик ракеталар, Жанубий Кореяни нишонга олишга қодир қисқа масофали ракеталар ва артиллерия тизимларини кенгайтириш режалари ҳақида гапирди.
Ким Чен Ин сўзларига кўра, сўнгги йиллардаги ядровий ва ракета дастурлари Шимолий Кореянинг ядровий давлат сифатидаги мақомини янада мустаҳкамлаган. У ядровий қуролларни мамлакат хавфсизлигининг “кафолати” деб атаган.
“Zamin”ни Telegram'да ўқинг!
