АҚШ Марказий қўмондонлиги (CENTCOM) Эрон тинч аҳолиси учун шошилинч хавфсизлик огоҳлантиришини эълон қилди. Расмий баёнотга кўра, Эрон ҳукумати Дизфул, Исфаҳон ва Шероз каби аҳоли зич жойлашган шаҳарлардан дронлар ҳамда баллистик ракеталарни учириш учун фойдаланмоқда. Ушбу ҳаракатлар тинч аҳоли ҳаётини жиддий хавф остига қўймоқда. Бу ҳақда tengrinews.kz хабар беради.
CENTCOM вакилларининг таъкидлашича, ҳарбий мақсадларда фойдаланилаётган ҳудудлар халқаро ҳуқуққа мувофиқ ўз ҳимоя мақомини йўқотади ва қонуний ҳарбий нишонга айланиши мумкин. Шу сабабли, АҚШ ҳарбийлари Эрон фуқароларини ўз уйларида қолишга ва ҳарбий объектлар яқинидан узоқроқ юришга чақирмоқда. Америка томони ўз ҳаракатларида тинч аҳолига зарар етказмаслик учун барча чораларни кўраётганини, бироқ Эрон режими томонидан фойдаланилаётган ҳудудларда хавфсизликни кафолатлай олмаслигини маълум қилди.
Эрон 2026 йил 28 февралдан буён юзлаб баллистик ракеталар ва минглаб зарбдор дронларни учирган. Бироқ АҚШ ва унинг ҳамкорлари Эроннинг ҳарбий салоҳиятини заифлаштириши ортидан ҳужумлар суръати пасайган. Шу билан бирга, 8 март куни Баҳрайн, Қувайт ва Бирлашган Араб Амирликлари Эрон томонидан фуқаролик инфратузилмаларига, жумладан, сув тозалаш иншоотларига янги ҳужумлар уюштирилганини хабар қилди. Эрон эса ўз навбатида АҚШ авиазарбалари оқибатида Қешм оролидаги сув таъминоти тизими шикастланганини даъво қилмоқда.
“Zamin”ни Telegram'да ўқинг!
