Европа Иттифоқи мамлакатлари АҚШ президенти Дональд Трампнинг чақириқларига қарамай, Ҳурмуз бўғозига денгиз кучларини юборишни режалаштирмаяпти, деди ЕИнинг ташқи сиёсат бўйича раҳбари Кая Каллас 16 март куни ЕИ ташқи ишлар вазирлари йиғинидан сўнг. Бу ҳақда Tengrinews.kz хабар беради.
Калласнинг айтишича, блок Яқин Шарқдаги можарога бевосита аралашишни истамайди. Унинг сўзларига кўра, ЕИга аъзо давлатлар ҳозирда Қизил денгизда кемачиликни ҳимоя қилишга қаратилган Aspides миссияси мандатини Ҳурмуз бўғозини ҳам қамраб оладиган тарзда кенгайтиришга тайёр бўлмаган.
“Бу Европанинг уруши эмас,” деди Каллас ва ҳеч ким жанговар ҳаракатларга янада чуқурроқ тортилишни истамаслигини ҳамда кўплаб ҳукуматлар можаро қаерга олиб боришидан хавотирда эканини қўшимча қилди. Шу билан бирга, у Қизил денгиз глобал савдо учун ҳануз муҳим эканини ва у ҳали ҳам жиддий эътибор талаб қилишини таъкидлади.
У, шунингдек, ҳусийлар томонидан аралашув хавфи ҳануз реал эканидан огоҳлантирди, бу эса Европа мамлакатлари ҳушёр бўлиб қолиши кераклигини англатади. Ўтган ҳафта Трамп Франция, Германия, Буюк Британия, Хитой, Япония ва Жанубий Корея каби бир қатор давлатларни Ҳурмуз бўғозида хавфсиз қатновни тиклашга кўмаклашиш учун ҳарбий кемалар юборишга чақирди. Германия эса минтақадаги ҳарбий миссияда Бундесвер иштирокини аллақачон рад этган эди.
“Zamin”ни Telegram'да ўқинг!
