Украина президенти Володимир Зеленский Россиянинг Украинага қарши урушини тугатиш бўйича АҚШ билан музокараларнинг янги босқичи 21 март куни бўлиб ўтишини айтди. У 19 март кунги кечки мурожаатида Киев делегацияси аллақачон АҚШга жўнаб кетганини ва ҳар икки томон мавжуд музокара форматларида ишни давом эттиришга тайёр эканини билдирди. Бу ҳақда Dw.com хабар беради.
Зеленский дипломатик саъй-ҳаракатлар бир муддат секинлашганини айтди, бироқ энди бу танаффус тугаши кераклигини қўшимча қилди. У Украина музокаралар мазмунли бўлишини ва жангларни тўхтатиш бўйича амалий қадамларга қаратилишини исташини таъкидлади. Унинг сўзларига кўра, Украина делегациясининг сиёсий қисми режалаштирилган учрашув учун аллақачон йўлга чиққан.
Делегация таркибига Миллий хавфсизлик ва мудофаа кенгаши котиби Рустем Умеров, президент девони раҳбари Кирилло Буданов ва парламент фракцияси етакчиси Давид Арахамия киради. Президент девони раҳбарининг биринчи ўринбосари Сергий Кислиця ҳам учрашувда иштирок этиши кутилмоқда.
Айни пайтда Германия канцлери Фридрих Мерц Европа ҳам Украина бўйича музокараларда иштирок этиши кераклигини айтди. У 18 март куни Бундестагдаги нутқида музокаралар Украина ва Европа мамлакатлари бошидан четлаб ўтган ҳолда бўлмаслиги кераклигидан огоҳлантирди. Шунингдек, у Москвага босимни давом эттиришга чақириб, Германияда Россия иқтисодиёти уруш ва санкциялар сабаб жиддий зарар кўраётгани ҳақида ишончли маълумотлар борлигини айтди.
“Zamin”ни Telegram'да ўқинг!
