Bloomberg 18 март куни келтирган янги ҳисоботга кўра, Шимолий Корея Украина уруши давомида Россияга тахминан 7,67 миллиард доллардан 14,4 миллиард долларгача баҳоланган қурол-яроғ ва қўшин юборган. Ҳисоб-китоблар Жанубий Кореянинг Миллий хавфсизлик стратегияси институти томонидан тайёрланган бўлиб, 2023 йил августида 2025 йил декабригача бўлган даврни қамраб олади. Тадқиқотчилар бу кенг диапазон ўқ-дори жўнатмаларининг аниқ тури ва ҳажми ҳақидаги маълумотлар чеклангани билан изоҳланишини айтишди. Бу ҳақда Dw.com хабар беради.
Ҳисоботда айтилишича, Россия асосан Пхеньянга сунъий йўлдош орқали аниқлаш қийин бўлган ҳарбий технологиялар ва юқори аниқликдаги компонентларни узатиш орқали ҳақ тўлаган. Хабарларга кўра, бу буюмлар умумий компенсациянинг 80 фоизидан 96 фоизигача қисмини ташкил этади. Бу кўрсаткич Корея мудофаа таҳлиллари институти берган аввалги баҳодан паст бўлиб, у Шимолий Кореянинг Россияни қўллаб-қувватлашдан олган фойдасини 2023 йил июлидан 2025 йил мартигача бўлган давр учун қарийб 20 миллиард доллар деб баҳолаган эди.
Москва ва Пхеньян ўртасидаги ҳарбий алоқалар Владимир Путин ва Ким Чен Ин 2024 йилда Россия етакчисининг 24 йил ичидаги Шимолий Кореяга илк ташрифи чоғида стратегик шериклик тўғрисидаги битимни имзолаганидан кейин чуқурлашди. Битимга кўра, агар томонлардан бири қуролли ҳужумга учраса, ҳар икки томон бир-бирига ҳарбий ёрдам кўрсатиши шарт. Ҳисоботда, шунингдек, илк йирик қурол етказиб беришлар 2023 йил августида бошлангани, 2024 йил 8 октябрдан 13 октябргача эса Шимолий Кореянинг 1 500 нафар махсус кучлар аскари Владивостокка етиб келгани айтилади.
Ҳисоботда келтирилган Жанубий Корея марказий банки маълумотларига кўра, Шимолий Корея иқтисодиёти 2024 йилда 3,7 фоизга ўсган, бу 2016 йилдан бери энг тез суръат бўлган. Мамлакатнинг номинал ялпи миллий даромади қарийб 44,4 триллион вонни ташкил этган, бу Жанубий Корея даражасининг тахминан 1,7 фоизига тенг.
“Zamin”ни Telegram'да ўқинг!
