АҚШ Конгрессида демократлар Эрон билан боғлиқ ҳарбий ваколатлар масаласида янги сиёсий усулни муҳокама қилмоқда. Axios маълумотига кўра, бир гуруҳ депутатлар уруш ваколатлари бўйича резолюцияни ҳар куни овозга қўйиб бориш орқали босимни кучайтириш ғоясини илгари сурган.
Бу ташаббус прогрессив демократлар йиғинида кўтарилган бўлиб, ҳозирча якуний қарор сифатида қабул қилинмаган. Шунга қарамай, кўплаб конгрессменлар унга қизиқиш билдирган.
Режага кўра, Конгресс иш фаолияти давом этадиган ҳар бир кун янги резолюция киритилиб, овоз беришга чиқарилади. Шу йўл билан масала кун тартибидан тушиб қолмаслиги таъминланмоқчи.
Аввалроқ шу масаладаги резолюция жуда оз фарқ билан рад этилган — 213 депутат қарши, 214 нафар эса қўллаб-қувватлаган.
Муҳокамалар жараёнида айрим марказчи демократлар ҳам бу тактикани тўлиқ рад этмагани айтилмоқда. Улар керак бўлса, қайта-қайта овоз бериш жараёнларига тайёр эканини билдирган.
Ташаббус тарафдорларига кўра, ҳатто резолюциялар қабул қилинмаса ҳам, бундай ёндашув депутатларнинг позициясини очиқлаштиради ва жамоатчилик эътиборини сақлаб туради.
Бундан ташқари, ёқилғи нархлари каби иккинчи даражали иқтисодий таъсирлар ҳам сиёсий муҳокама марказида қолиши мумкин.
Кузатувчилар эса бу усулни демократларнинг Трамп маъмурияти сиёсатига қарши янги босим стратегияси сифатида баҳоламоқда.
“Zamin”ни Telegram'да ўқинг!
