Россия президенти Владимир Путин Украина масаласини ҳал этиш бўйича якуний келишувга эришилганидан кейин Володимир Зеленский билан учрашув ўтказишга қарши эмаслигини билдирди. У 9 май куни Москвада ўтказилган Ғалаба парадидан бир неча соат ўтиб журналистлар қаршисига чиқиб, Украина можароси, эҳтимолий музокаралар ва якуний битим ҳақидаги саволларга жавоб қайтарди.
Путиннинг таъкидлашича, агар Зеленский у билан шахсан учрашишни хоҳласа, Россия бундай мулоқотдан ҳеч қачон бош тортмаган. У ҳатто “ким истаса, Москвага келиши мумкин”, деган мазмунда фикр билдирган. Шу билан бирга, Россия раҳбари учрашув бошқа давлат ҳудудида ўтказилишига ҳам қарши эмаслигини айтган.
Бироқ Путин бундай учрашув оддий музокара учун эмас, балки аллақачон тайёрланган ва келишилган ҳужжатни имзолаш учун бўлиши кераклигини урғулади. Унинг фикрича, давлат раҳбарлари даражасидаги мулоқот якуний нуқта вазифасини бажариши лозим.
“Бу учрашув якуний нуқта бўлиши лозим. Чунки биз музокаралар нималигини биламиз. Мен буни шахсан Минскдаги музокараларда билиб олганман. Соатлаб, кечаси-ю кундузи тинимсиз гаплашасан, лекин фойдаси бўлмайди”, — деди Россия президенти.
Путиннинг сўзларига кўра, аввал мутахассислар, дипломатлар ва ишчи гуруҳлар ҳар икки томон учун тушунарли ва қабул қилиниши мумкин бўлган ҳужжатлар устида ишлаши керак. Фақат шундан кейингина етакчилар исталган жойда учрашиб, битимни имзолаши ёки имзолаш жараёнида иштирок этиши мумкин.
Россия раҳбари брифинг давомида Украинадаги можаро якунига яқинлашаётганини ҳам айтган. У бу жараён жиддий ва мураккаблигича қолаётганини таъкидлаган бўлса-да, вазият маълум бир босқичга келиб қолганини билдирган.
Путин 2022 йилда Истанбулда Россия ва Украина ўртасида келишувга яқинлашилганини ҳам эсга олди. Унинг айтишича, ўша вақтда томонлар муайян ҳужжатлар бўйича келишувга эришган, аммо кейин вазият ўзгарган. Россия раҳбари Франция президенти Эммануэл Макрон унга қўнғироқ қилиб, Украина бундай тарихий ҳужжатларни “чаккасига тўппонча тиралган ҳолда” имзолай олмаслигини айтганини таъкидлади.
Путиннинг маълум қилишича, ўша келишувга кўра, Россия ўз қўшинларини Киев атрофидан олиб чиқиб кетиши керак бўлган ва Москва бунга рози бўлган. Аммо кейин Буюк Британиянинг ўша вақтдаги бош вазири Борис Жонсон Россия билан бу келишувни имзолаш мумкин эмаслигини, чунки у адолатсиз эканини айтган.
Россия президенти бу ҳолатни шарҳлар экан, агар Украина томони вакили ҳужжатларни маъқуллаган бўлса, унинг адолатли ёки адолатсиз эканини ким белгилаши керак, деган саволни ўртага ташлади. У Ғарб сиёсатчилари аралашуви натижасида қарама-қаршилик янада кучайганини иддао қилди.
“Украина томони вакили бу ҳужжатларни маъқуллаган бўлса, унинг адолатли ёки адолатсиз эканини ким белгилайди? Бу ерда адолатсизлик нимада, буни ким ҳал қилади?” — деди Путин.
Унинг фикрича, Украинага ёрдам ваъда қилинганидан кейин Россия билан қарама-қаршилик янада авж олган. Путин бу жараён ҳали ҳам давом этаётганини, бироқ иш якунига яқинлашиб қолганини айтди.
Ҳозирча Зеленский ва Путин ўртасида эҳтимолий учрашув қачон ва қаерда бўлиши ҳақида аниқ маълумот йўқ. Аммо Россия раҳбарининг баёноти шуни кўрсатмоқдаки, Москва бундай мулоқотни фақат якуний келишув тайёр бўлганидан кейин маъқул кўради.
Украина можароси атрофидаги вазият эса ҳамон мураккаблигича қолмоқда. Томонлар ўртасидаги ҳар қандай дипломатик сигнал халқаро майдонда катта эътибор билан кузатилмоқда. Чунки бу урушнинг тақдири нафақат Россия ва Украина, балки бутун Европа хавфсизлиги ва глобал сиёсий мувозанатга ҳам таъсир кўрсатмоқда.
“Zamin”ни Telegram'да ўқинг!
