Электр устунига чиқиб олган айиқ интернетни лол қолдирди

АҚШнинг Нью-Мексико штатида электр узатиш устуни тепасида қолиб кетган улкан айиқ акс этган видео ижтимоий тармоқларда кенг тарқалиб, минглаб интернет фойдаланувчиларини ҳайратга солди. Ғайриоддий ҳолат акс этган видеолавҳа қисқа вақт ичида вирусга айланди ва катта муҳокамаларга сабаб бўлди.

Видеонинг X ижтимоий тармоғида эълон қилингани, кейинчалик эса АҚШ Ички ишлар вазирлиги томонидан ҳам қайта улашилгани маълум қилинди. Нашр этилган лавҳа ўн минглаб томошабинлар эътиборини тортди. Вазирлик ўз саҳифасида ҳазиломуз изоҳ ҳам қолдириб, шундай ёзди: «Биз Американинг энергетик устунлигини қўллаб-қувватлаш ҳақида гапирган эдик, аммо буни назарда тутмаган эдик».

Ҳақиқий экани тасдиқланган видеода айиқ Нью-Мексико штатининг Гладстон ҳудудида электр узатиш устунининг юқори қисмида нафаси тезлашган ҳолда олд панжалари билан кўндаланг темирни маҳкам ушлаб тургани, орқа оёқлари эса пастга осилиб турганини кўриш мумкин.

Видеони тасвирга олган шахс 911 хизматига қўнғироқ қилиб, «Электр устуни тепасида айиқ борлиги ҳақида хабар бермоқчиман», дейди. Диспетчер эса бу ҳақда аввал ҳам мурожаатлар бўлганини айтиб, «Биз бу ҳақда Ёввойи табиат ва балиқ ресурслари хизматига хабар бердик, аммо ҳозирча улар ҳеч нарса қила олмаслигини айтди», дея жавоб қайтарган.

Операторнинг тушунтиришича, агар мутахассислар айиқни тинчлантирувчи дори билан ухлатишга уринса, у баландликдан қулаб тушиб ҳалок бўлиши эҳтимоли жуда юқори бўлган. Шу сабабли вазиятни хавфсиз ҳал этиш осон кечмаган.

Ҳодисага гувоҳ бўлган Шеннон Малленс Storyful нашрига айтишича, у Нью-Мексикодан Оклахомага 56-автомагистраль орқали кетиб бораётганида мазкур манзарага кўзи тушган.

«Дастлаб кўрганларимизга ишона олмадик. Шунинг учун ортимизга қайтиб, яна бир бор қарашга қарор қилдик», дейди у.

Унинг сўзларига кўра, аввал айиқ ўлган, деб ўйлашган. Бироқ унга яқинлашгач, жонивор ҳали тирик эканини англашган.

Афсуски, маълум вақт ўтгач, айиқ нобуд бўлган. Ҳозирча унинг айнан қандай ҳолатда ҳалок бўлгани ҳақида расмий маълумот берилмаган. Бироқ мазкур воқеа ижтимоий тармоқларда катта қизиқиш уйғотиб, ёввойи ҳайвонларни қутқариш имкониятлари ҳақида кенг муҳокамаларга сабаб бўлди.