Красноярскда полициячи қизни ўгай ота узган ўқдан тўсиб ҳалок бўлди

Красноярск ўлкасида полициячи қизни ўгай ота узган ўқдан тўсиб ҳалок бўлди. Бу ҳақда «Россия ИИВ» ўлка бошқармаси хабарига таяниб «Дарё» ёзмоқда.

Дивногорск шаҳар навбатчилик қисмига 19 ёшли қиз мурожаат этиб, уйида можаро юз бераётгани, ўгай отаси эса квартирага қўймаётганидан шикоят қилди. Ҳодиса жойига катта сержантлар Денис Сумин ва Павел Волосунов жўнади. Подъездга кириб, улар мазкур квартирадан ёрдам сўралган қичқириқларни эшитди.

Сумин ичкарига киришга ҳаракат қилди, бироқ унга ов қуролидан ўгай қизини отиб ташлашга уринган эркак халақит берди. Полициячи ёнида турган қизни итариб юборди ва ўзи ўққа нишон бўлди. Иккинчи полициячи ҳамкасбига ёрдам бериш чоғида яраланди.

Шундай бўлса ҳам, қиз ва Суминни кўчага олиб чиқиш ҳамда ёрдам чақиришга муваффақ бўлди. Икки сержант ҳам жонлантириш бўлимига етказилди. Сумин ўзига келмай ҳаётдан кўз юмди, Волосуновнинг ҳаёти хавф остида эмас.

Воқеа жойига келган ёрдам кучлари квартирада қизнинг онаси ва ўгай отаси жасадига дуч келди. Дастлабки тахминларга кўра, эркак жонига қасд қилган. “Замин” янгиликларини “Инстаграм”да кузатиб боринг