Россия ривожланаётган мамлакатларга 2017 йилда 1,2 млрд доллар берди

2017 йилда Россия ривожлланаётган мамлакатларга кўмак тариқасида 1 миллиард 200 миллион доллардан ортиқ маблағ берди. Бу ҳақда ташқи ишлар вазирининг ўринбосари Александр Панкин баёнот берди. Бу ҳақда «РИА Новости»га таяниб Tnews.uz ёзмоқда.

Гап бу ерда икки томонлама муносабатлар доирасида, шунингдек халқаро тузилмаларга, жумладан БМТга бадал сифатида Москва томонидан берилган маблағлар ҳақида бормоқда, дея изоҳ берди Панкин.

Унинг сўзларига қараганда, Москва собиқ совет ҳудудларидаги мамлактларни, шунингдек «Лотин Америкаси ва Осиёдаги азалий стратегик ҳамкорларни» қўллаб-қувватлайверади. Амалдор бу каби давлатлар “етарлича аниқланганини” айтар экан, аниқ бир мамлактни тилга олмади.

Экспертларнинг фикрича, 11 йил мобайнида Россия бюджетидан хорижий давлатларга кўмак мақсадида ажратилган маблағлар 11 баробар ошган. 2005 йилда бу рақам юз миллион долларни ташкил қилган эди. Экспертлар Россиядан энг кўп кўмак оладиган учта давлат- Қирғизистон (323 миллион доллар), Арманистон (37,3 миллион доллар) ва Тожикистон (21,7 миллион доллар) эканлигини айтишади.

Сўнги йилларда Москва бошқа мамлакатларнинг 80 миллиард доллардан ортиқ қарзини кечиб юборди, айни дамда Россиянинг ўзининг ташқи қарзи 50 миллиард доллардан ортиқни ташкил қилади.