Мексика кўчаларидан бирида юк машинаси кузовидан 9 нафар одамнинг жасади топилди…

Воқеа Мексиканинг Герреро штатига қарашли Чильпансинго шаҳар кўчасида содир бўлган. Ҳуқуқни муҳофаза қилиш ташкилоти ходимлари йўл четига қўйиб кетилган юк машинасини назоратдан ўтказиш жараёнида кузовга 9 та мурда беркитилганига гувоҳ бўлишди. Тахминларга кўра, бу машинадан қонунга зид мақсадлар йўлида фойдаланилган бўлиши мумкин. Демак, гап айланиб яна наркотик савдосига тақалади.

Полициячиларнинг гапига қараганда, яқинда шу шаҳарда яшовчи 9 нафар одам бедарак йўқолган. Уларнинг барчаси наркотик савдосига алоқадор экани аниқланган, деб ёзмоқда Hordiq.uz сайти.

Штат прокуратураси ушбу факт юзасидан жиноий иш қўзғатди. Тергов ҳаракатлари давом этмоқда.

Эслатиб ўтамиз, Мексиканинг Герреро мамлакатдаги штати энг хавфли штатлардан бири ҳисобланади. Шу ҳудудда Америкага улгуржи тарзда жўнатиладиган наркотик моддаларни назорат қилувчи ашаддий каллакесарлар истиқомат қилади. Ачинарлиси, бу жиноятларга кўплаб полициячилар ҳам шериклик қилади. Масалан, 2014 йил сентябрида айнан шу штатдан жами 43 нафар талаба ўғирлаб кетилган. Кейин маълум бўлдики, талабаларни полициячилар ўғирлаб, каллакесарлар қўлига топширган экан.