«Рус мафиясига алоқадор». АҚШда россиялик яна бир миллиардернинг активлари музлатилди

АҚШда россиялик миллиардер ва «РУСАЛ» концерни эгаси Олег Дерипасканинг активлари музлатилди. Бу ҳақда New York Post нашри Америка Молия вазирлиги амалдорларига таянган ҳолда ёзмоқда.

Апрель ойида АҚШ ҳукумати миллиардер Олег Дерипаскани санкциялар рўйхатига қўшди. Хусусан, Нью-Йоркдаги Юқори Ист-Сайд туманида, шунингдек, Вашингтонда жойлашган қаср музлатиб қўйилган активлар орасига киритилди.

АҚШ расмийларининг фикрича, Дерипаска «рус мафияси етакчиларига», шунингдек, Кремлга алоқадор, дейилади материалда. Шунингдек, нашрнинг ёзишича, Дерипаска йиллар давомида Қўшма Штатларда молиявий фирибгарликда айбдор деб топилган АҚШ президентининг сайловолди кампанияси собиқ раҳбари Пол Манафортга пул тўлаб келган. Ҳозирги вақтда Манафорт «Россия иши» бўйича суриштирув жараёнига раҳбарлик қилаётган АҚШ махсус прокурори Роберт Мюллер жамоаси билан ҳамкорлик қилмоқда.

Ҳозирда АҚШ Молия вазирлигининг мансабдор шахслари Дерипаска билан Европада активлар билан амалиётлардан бош тортиш бўйича музокаралар олиб бормоқда, деб хабар қилади NY Post.

Россиялик миллиардер 2008 йилда кўчмас мулкни 42,5 миллион долларга сотиб олган, дейилади материалда.

Эслатиб ўтамиз, аввалроқ АҚШ россиялик миллиардер Владимир Евтушенковга санкция қўлламоқчи экани, у Ўзбекистонда ноқонуний операциялар амалга оширгани хабар қилинганди.