Бугун коинотга учирилган "Союз" космик кемаси ҳалокатга учради, экипаж тирик қолди

Байконур космодромидан учирилган Россиянинг "Союз" космик кемаси стартдан бир неча дақиқа ўтиб ҳалокатга учради, деб ёзмоқда Спутник.

Кема ичида бўлган россиялик космонавт Алексей Овчинин ва америкалик астронавт Ник Хейг қўниш капсуласида соғ-омон ерга қўнишган.

“Роскосмос” раҳбари Дмитрий Рогозин ушбу ҳодиса содир бўлганидан бир неча соат ўтиб Байконурга етиб борган ва вазиятни жойида бошқариб бормоқда.

Дастлабки хулосаларга кўра, ракета ташувчининг биринчи босқичда ишлайдиган 4 та двигателдан бири керакли вақтда корпусдан ажралмаган ва бунинг оқибатида иккинчи босқич двигателлари ишламай қолган. Айни дамда фожеа сабаблари ўрганилмоқда.

Роскосмос хабарига кўра, ушбу авария Россия космик кемалари билан 2001 йилдан буён содир бўлган биринчи авариядир.