Италияда коронавирусга қарши вакцина нархи маълум қилинди

^{Фото: astrazeneca / Instagram}
Италия соғлиқни сақлаш вазирлиги коронавирусга қарши вакцина бепул тарқатилишини, уни биринчи навбатда хавф гуруҳига кирувчи одамлар олишини маълум қилди. Таъкидланишича, бундай вакцинанинг бир дозаси таннархи 2,5 еврони ташкил қилади.

Коронавирусдан вакцина яратиш учун ташкил этилган альянс (Inclusive Vaccine Alliance, IVA) таркибига кирган Италия, Франция, Германия ва Нидерландия вакцинани ишлаб чиқаётган AstraZeneca компаниясига 300 млн доза вакцина учун 750 млн евро тўлайди. Шу тариқа Оксфордда жойлашган компания яратадиган AZD1222 деб номланган вакцинанинг нархи 2,5 еврони ташкил қилади.

“Вакцина коронавирус муаммосини батамом ҳал қилишнинг ягона йўлидир. У мен учун оз кишилар эмас, балки барча оладиган глобал ижтимоий бойлик бўлиб қолади”, деб айтган Италия соғлиқни сақлаш вазири Роберто Сперанца.

IVA иштирокчиларининг AstraZeneca билан вакцина етказиш бўйича шартномани имзолаши 13 июнда эълон қилинган. Шартномага кўра, вакцина харидорларга 2020 йил охирида тақдим қилиниши мумкин.

AstraZeneca’да маълум қилинишича, AZD1222 вакцинаси 320 нафар одамда синалган ва синовлар давомида у яхши ўзлаштирилиши исботланган. Бироқ бунда тана ҳарорати ошиши, бош оғриғи, оёқ-қўлларнинг оғриши ёки ОРВИ аломатлари каби қисқа муддатли иккиламчи таъсирлар кузатилиши мумкин.

Компанияда ваъда берилишича, вакцина билан эмлаш коронавирусга чалинишга олиб келмайди, инсон иммун тизими коронавирус чақирувчи касалликка қарши кураша олиши учун бир эмлаш етарли бўлади.

Манба: Kun.uz «Замин»ни Telegram’да ўқинг!