Фото: AA
Назоратдан чиқиб кетган ижтимоий тармоқлар дунё давлатлари тинчлиги ва миллий хавфсизлигига таҳдид туғдирмоқда. Бу ҳақда Туркия президенти Ражаб Тоййиб Эрдўғон Истанбулда 22 сентябрь куни бошланган Туркий тилли давлатлар ҳамкорлик кенгашига аъзо мамлакатларнинг медиафоруми иштирокчиларига йўллаган видеомурожаатида гапирган.
Туркия раҳбари ўз нутқида туркий ва мусулмон дунё ўлкалари медиамаконда дуч келаётган жиддий хатарларга эътибор қаратган.
«Ижтимоий тармоқлар кенг тарқалган бугунги даврда бутун инсоният қаторида биз ҳам ахборот хуружларига нишон бўлмоқдамиз. Дунё бўйлаб миллионлаб кишилар сохта ва янглиш янгиликлардан азият чекмоқда, битмас маънавий жароҳат олмоқда», – дейди Р.Т.Эрдўғон.
Таъкидланишича, бирор бир мамлакат рақамли фашизмдан ўзини омонда дея олмайди. Негаки, назоратдан чиқиб кетган ахборий макон демократиянинг ўзига ҳам таҳдид солаётир.
«Туркий олам рақамли фашизмдан ташқари халқаро оммавий ахборот воситаларининг иккиёқлама стандартларидан ҳам зиён кўрмоқда. Тоғли Қорабоғдаги 44 кунлик уруш пайтида намоён бўлган иккиюзламачилик мамлакатларимиз учун муҳим масалани кун тартибига чиқарди. Ушбу уруш даврида арман армиясининг хунрезлиги, тинч аҳоли устига баллистик ракеталар йўллагани ёритилмади. Матбуот эркинлиги ва холислигини байроқ қилиб келган халқаро ОАВ Арманистон расмий ахборот агентлиги вазифасини ўтади. Қорабоғ урушида бизнинг мамлакатлар, туркий олам ҳақидаги ҳақиқатлар яна яширилди. Бу биринчи ва охирги ҳолат эмас», – дейди мезбон давлат раҳбари.
Туркия президенти девони жамоатчилик билан алоқалар бошқармаси томонидан ташкил этилган, «Илдизлари мустаҳкам тарих, кучли келажак» шиори остида ўтаётган медиаанжуман иштирокчиларига мурожаатда аччиқ тажрибадан тўғри хулоса чиқариш муҳимлиги қайд этилди. Президент Эрдўғонга кўра, туркий дунё ўлкалари ОАВ, дезинформация, ахборий хавфсизлик каби соҳаларда ҳам ҳамкорликни кучайтириши, ахборот маконини хорижликларга қўшқўллаб топшириб қўймаслиги лозим.
Кейинги йилларда дунё миқёсида ахборий хуружлар, жумладан, муқаддас динни ёмонотлиққа қилишга уринишлар авж олмоқда. Мусулмон оламида етакчи давлатлардан бири саналган Туркия раҳбарияти бунга қарши курашиб келмоқда.
Президент Эрдўғоннинг яқинда чоп этилган «Дунё адолатлироқ бўлмоғи мумкин» (Daha Adil Dünya Mümkün) деб номланган китобида ҳам дунё бўйлаб кузатилаётган адолатсизлик, миграция инқирози, халқаро терроризм, исломофобия, сиёсий мунофиқлик каби иллатлар хусусида сўз юритилади. Қайд этилишича, бугун инсоният учун сув билан ҳаводек зарур қадрият бу – адолатдир.
Бундан бир йил аввал, 2020 йил октябрь ойида президент Эрдўғон Франция раҳбари Эммануэль Макроннинг ислом дини хусусидаги баёнотига ҳам кескин танқидий муносабат билдирганди. Франция етакчиси ислом дини бутун дунёда инқирозни бошдан кечираётгани, «ислом сепаратизми» ҳақида мунозарали фикрлар айтган эди. Туркия раҳбари ислом инқироз ҳолатида деган иддаони ҳурмат чегараларини бузиш, очиқ провакация деб баҳолаган. У, айни чоқда, айрим Ғарб мамлакатларида ирқчилик ва исломофобия давлат томонидан ҳимоя қилинаётганини хавотирли ҳол ўлароқ қайд этган.
Аввалроқ расмий Анқара Янги Зеландиядаги масжидга ҳужум уюштирилган 15 март санасини Исломофобияга қарши халқаро бирдамлик куни деб эълон қилишни таклиф этган.
С.Салим
“Замин” янгиликларини “Twitter”да кузатиб боринг
Ctrl
Enter
Хато топдИнгизми?
Иборани ажратиб Ctrl+Enter тугмасини босингМавзуга оид янгиликлар
Туркия Исроил президенти самолётини ҳаво ҳудудига киритмади
20 ёшли ўзбекистонлик қизни қариндоши Туркияга сотиб юборди
Рашида Толиб Конгресс аъзоларига «аччиқ ҳақиқат»нинг суратини кўрсатди
Эрон АҚШдан 1 трлн доллар компенсация талаб қилди
Ким Чен Ин ҳарбийларни жанговар ҳолатда туришга чақирди
Шимолий Корея Россияга узоққа зарба берувчи қуроллар юборди
Байден ва Жинпинг Перуда учрашди: «Агар бир-биримизни рақиб деб билсак, муносабатларни бузамиз»
Россиялик депутат: «Олий маълумотлиларнинг курерлик қилиши — ватанпарварликка зид»
