5 кунлик сув парҳези танангизга нима қилади?

Сўнгги йилларда инсон саломатлигига оид турли тажрибалар орасида сувли очлик кенг муҳокама этилмоқда. Кўплаб инсонлар 5 кун давомида фақат сув ичиш орқали нафақат вазн йўқотиш, балки ички аъзолар фаолиятини тиклаш ва онг равшанлигини оширишга интилмоқда. Аммо бундай очлик жараёнида танамиз ва онгимизда нима кечиши ҳақида кўпчилик етарли маълумотга эга эмас.

Биринчи кун — бу тананинг "ўтиш" босқичидир. Одатда организмдаги глюкоза заҳиралари етарли миқдорда бўлади ва танамиз уларни ёқишда давом этади. Одамда сабрсизлик, енгил бош оғриғи ва овқат ҳақида ўйлаш ҳолатлари кузатилади. Аммо тана бу жараёнга тез мослаша бошлайди.

Иккинчи ва учинчи кунларда организм глюкозани тўлиқ сарфлаб бўлади ва эндиликда энергия манбаи сифатида ёғ қорларидан фойдаланишга ўтади. Бу босқичда одам ўзини енгил ҳис қилиши, онги равшанлашиши, ҳатто кайфияти кўтарилиши мумкин. Бу кетоз деб аталадиган ҳолатдир — организм ёғларни парчалай бошлайди.

Тўртинчи кунга келиб, тананинг ички тозаланиши жадаллашади. Жигарда ва буйракларда детокс жараёнлари фаоллашади. Иммун тизимидаги заиф ҳужайралар йўқ қилина бошлайди. Бу жараён аутофагия деб номланади. У кўплаб олимлар томонидан қаришни секинлаштирувчи омил сифатида тан олинган.

Бешинчи кун — танадаги энг юқори даражадаги тозаланиш ва қайта шаклланиш босқичидир. Бу вақтда кўпчилик оғирлик йўқотганини ҳис қилади, уйқу яхшиланади, эътибор ва диққат ортади. Шу билан бирга, баъзи инсонларда қувват пасайиши, мушак заифлиги ва бош айланиши кузатилиши мумкин. Бу ҳолатлар танада энергия манбалари тугаб бораётгани билан боғлиқ.

Сувли очликнинг онгга таъсири ҳам эътиборга молик. Илмий тадқиқотлар шундай очлик ҳолатида инсон миясида янги нейрон алоқалар пайдо бўлишини, хотира ва эътибор каби функциялар кучайишини кўрсатган. Айрим ҳолларда медитацион ҳолатлар пайдо бўлиши, инсоний ҳиссиётлар чуқурлашиши мумкин.

Шунга қарамай, 5 кунлик сувли очлик ҳар ким учун ҳам мос эмас. Қон босими пастлар, диабетиклар, юрак касаллиги борлар, ҳомиладор ёки эмизикли аёллар учун бундай очлик тавсия этилмайди. Шифокор назоратида ва тайёргарлик билан ўтказиш зарур.

Хулоса қилиб айтганда, 5 кунлик сувли очлик — бу нафақат тана, балки онг учун ҳам жиддий синовдир. У инсонни нафақат енгиллаштиради, балки ўзига қайта қарашга, одатларини таҳлил қилишга ва ўзини янгидан шакллантиришга ёрдам беради. Аммо ҳар қандай очлик тажрибаси масъулият ва назорат билан бажарилиши керак. «Замин»ни Telegram’да ўқинг!