The Guardian нашри келтирган сўнгги илмий хулосаларга кўра, юқори ҳарорат инсон организмининг қариш жараёнини тезлаштириши мумкин.
Мутахассислар таъкидлашича, иссиқликнинг салбий таъсири чекиш, спиртли ичимликларни меъёрдан ортиқ истеъмол қилиш, нотўғри парҳез ёки жисмоний ҳаракатнинг камлиги каби саломатликка зарарли одатлар билан деярли тенглашиши мумкин.
Тадқиқотда иштирокчиларнинг биологик ёшини аниқлаш учун турли тиббий тестлар қўлланилган. Кейинчалик олимлар ушбу кўрсаткични уларнинг ҳақиқий ёши билан таққослаб, иссиқлик ва қариш жараёни ўртасидаги боғлиқликни ўрганишди.
Хулосаларга кўра, айниқса ғайритабиий даражада узоқ давом этувчи иссиқ об-ҳаво қаришни тезлаштиради. Юқори ҳароратнинг бундай таъсирини аниқ сабаблари ҳали топилмаган бўлса-да, ДНКда юз бериши мумкин бўлган шикастланиш эҳтимол омиллардан бири сифатида қайд этилган.
Ушбу тадқиқотда турли ёш ва касалликларга эга 25 мингдан ортиқ катталар қатнашган. Бироқ уларнинг қанча вақт қуёш остида қолиши, уйда совутиш тизимлари қай даражада ишлаши ёки кондиционердан фойдаланиш ҳолати ҳисобга олинмаган.
«Замин»ни Telegram’да ўқинг!
