Жоду қилинган одам...

Жамиятимизда кенг тарқалган, иймонимизга катта хатар солувчи нарсалардан бири сеҳр-жодудир. Афсуски, бугунги кунда одамлар орасида сеҳр-жоду билан шуғулланиш ниҳоятда авж олиб боряпти. Бунга кўпроқ аёллар ружу қўйган.

Бировнинг жойини, мансабини эгаллаш, ўзининг жойини бировга бермаслик, бировнинг хотинини қўлга киритиш, бировнинг эрини тортиб олиш – буларнинг барчасига сеҳр-жоду билан эришаман, деб ўйлаб, иймонидан айрилиб, охиратини барбод қилаётганлар қанча. Аёллар эрини қизғаниб, ноўрин, асоссиз рашк қилиб, бошқалар тортиб олмасин, деб ўқитиб юришади. Бунинг гуноҳлигини айтсангиз, бировга иссиқ-совуқ қилмаяпмиз, сеҳр қилмаяпмиз, “иситсам ўзимга иситяпман-ку, домлага ўқитяпман-ку”, дейишади.

Баъзи уламолар: “Бундай ўқитишлар етти мартага борса, жодуга айланади”, деганлар. Жоду қилинган одамда турли салбий ҳолатлар юз беради. Баъзи олимлар: “Жоду қилинган одамда бешта нарсанинг бири ёки ҳаммаси бўлади: кўзи кўр бўлиб қолади, мижози сустлашади, камбағаллашади, қамалиб қолади, бешинчиси эса ўлимдир”, деганлар. Жодуга учраган одам шу беш нарсанинг бири ёки ҳаммасига учрайди.

Буни билмаган баъзи жоҳила, илмдан бехабар аёллар эрини қизғаниб, гўё оилани сақлаб қоламан, деб шу ишларни қилиб юради. Дуч келган, кимлиги, илмий савияси, ақийдаси номаълум одамларга бориб, улар айтган пулни бериб, эрларини ўқитаверишади. Билиб-билмай қилаётган мана шу иши туфайли бир куни бошига шу бешта нарсанинг бири келганида пушаймон бўлиб қолишади. Айримлар: “Эрим уйда ўтирсин”, деб ўқитишади. Уларнинг асли мақсади эрининг уйида ўтириши эмас. Балки унинг топганига қаноат қилмай, бировга сарфлаяпти, деган ёмон гумон билан уни уйда ўтирсин, деб жоду қилдиради. Аммо эри бир кун уйда ўтириб қолса, бунга ҳам чидай олмай, “Кўчага чиқиб, ишлаб пул топиб кел”, дейишади.

Оиламни сақлаб қоламан ёки маълум бир мансабга эришаман, бировнинг жойига эга бўламан деб қилаётган ҳаракатлари оқибатида куфрга кетаётган одамлар кўпайиб боряпти, азизлар. Бу ишларнинг қанчалик оғир гуноҳ эканини, оқибати қанчалик аянчли эканини халқимизга тушунтириб, жамиятимизни бундай иллатлардан тозалаш, насл-насабимизни, авлодимизни, зурриётларимизни бу кирликлардан халос этиш вақти келди.

Абу Ҳурайра розияллоҳу анҳудан ривоят қилинган машҳур ҳадиси шарифда Пайғамбар алайҳиссалом шундай деганлар: “Ҳалок қилувчи етти нарсадан сақланинглар: Аллоҳга ширк келтириш; сеҳр-жоду қилиш; ноҳақ одам ўлдириш; рибохўрлик; етимнинг молини ейиш; жанг майдонидан қочиш; покиза аёлларни зинода туҳмат қилиш”.
Эътибор қилган бўлсангиз, бу ерда саналган еттита гуноҳнинг барчаси жамиятда турли шаклларда учраб туради.

Биз негадир ширк деганда фақат бутларга сиғиниш, Аллоҳдан бошқа илоҳлар бор деб тушунишни кўз олдимизга келтиришга ўрганиб қолганмиз. Аммо ширкнинг ниҳоятда махфий, яширин, аммо энг маккор, ниқоб остидаги кўринишлари ҳам борлигини унутмаслигимиз керак. Сеҳр-жоду қилиш бир қарашда хатари йўқдек кўринади, лекин замирида ширк бўлади. Буларни фарқлашимиз, айтаётган гапимизга, бажараётган ишимизга, ҳатто ниятларимизга, ўй-фикрларимизга жиддий эътибор қилишимиз керак. Бугун жамиятда энг кўп тарқалган, одамлар имонига, маънавиятига жуда катта хатар солаётган сеҳрга нисбатан ақийдамиз шундай: сеҳр бор нарса, у таъсир қилади, аммо динимиз таълимотига кўра, бу иш билан шуғулланиш ҳам, уни тарғиб қилиш ҳам мумкин эмас!

Манба: Erk.uz