Нима учун тушкунликка тушамиз?

Нега ҳар ишдан ҳадиксирайверамиз. Ахир ҳаёт шундай қурилганку! Бизнинг суянчимиз Аллоҳ таолоку! Ким кимгадир ишонса, у ишонгани бандадир, фонийдир. Ким Аллоҳга ишонса, У Раббдир, боқийдир. Бизнинг суянчимиз Аллоҳ таоло мана нима демоқда:

"У қавмни қувишда бўш келманг. Агар озор чекаётган бўлсангиз, улар ҳам сиз озор чекаётганингиздек озор чекмоқдалар. Сиз эса, Аллоҳдан улар умид қилмаган нарсани умид қилмоқдасиз. Аллоҳ билувчи ва ҳикматли зотдир". ("Нисо" сураси, 104-оят).

"Бўшашманглар! Хафа бўлманглар! Сизлар, агар мўмин бўлсаларингиз, устунсизлар." (Эй мусулмонлар! Ҳеч бўшашманглар, заифлашманглар, сизга етган мусибатларга, бошингизга тушган оғирликларга хафа бўлманглар. Сизлар дунёда ҳаммани ҳидоятга даъват қилувчиларсиз. Улар зулматга, залолатга чақирувчилардир. Сизлар икки дунё саодатига эгасиз. Улар икки дунё бадбахтлигига эгадирлар.)


"Агар сизга жароҳат етган бўлса, у қавмга ҳам шунга ўхшаш жароҳат етган. Бундай кунларни одамлар орасида айлантириб турамиз. Токи Аллоҳ иймон келтирганларни билиши учун ва улардан шаҳидларни чиқариб олиши учун. Ва Аллоҳ золимларни севмайди". (Яъни, бир ундай, бир бундай бўлиб туради. Агар иш бир хилда тураверса, дунёнинг қизиғи қолмайди. Доимо мусулмонлар ғолиб келаверса, ҳамма ўзини мусулмон деб эълон қилиб юборади. Оқибатда ҳамма аралашиб кетиб, ким ҳақиқий мўмин-мусулмон, ким юзаки эканини одамлар била олмай қоладилар. Қийинчилик, оғир ҳолатларда мўминлар мунофиқлардан ажраб чиқадилар. ("Оли-Имрон" сураси, 140-оят).

Мен Аллоҳнинг бу таълимотларини қандайдир арзимас кишилар ё ҳодисалар туфайли келтираётганим йўқ. Балки, Аллоҳнинг Каломи бизга абадий ва амалий дастуруламалдир. Азизлар Қуръонни ўқийлик, англайлик ва амал қилайлик!

Манба: Azon.uz “Замин” янгиликларини “Facebook”да кузатиб боринг