Коронавирус сабаб юзага келган хавотирни камайтиришнинг 6 усули

^{Фото: Getty Images}
Коронавирус пандемияси бутун сайёрадаги инсонлар ҳаётини ўзгартириб юборди. Кўпчилик олдингидан кўра асабий бўлиб қолгани ҳам ажабланарли эмас: инсон ўзи ва яқинлари учун қайғурмоқда. Cosmopolitan ваҳимадан қутулиш ва ўзини яхши ҳис қилиш учун нималарга эътибор қаратиш лозимлиги ҳақида маълумот тўплаб тақдим этди.

Ўзингиз ҳақингизда қайғуринг
Ғамгин фикрлар сабаб инсон ўзини осонликча унутиб қўйиши мумкин. Ҳеч бўлмаганда 7 соат ухлаш, мароқли ҳордиқ чиқариш ва имкон борича спорт билан шуғулланиш керак. Соғлиқ учун қилинган ҳар қандай жисмоний ҳаракат, руҳий жиҳатдан ҳам фойдали. Хоббиларга вақт ажратиш, мусиқа тинглаш ва яқинлар билан мулоқот қилиш даркор.

Ҳаводан нафас олинг
Бугунги кунда бутун дунёда сабабсиз кўчага чиқиш тақиқланган, айрим давлатларда комендантлик соати ҳам жорий этилган. Балконга чиқиб, агар балкон бўлмаса, деразани очиб хонани тоза ҳавога тўлдириш керак. Кўчада эса, албатта, бошқалардан 1,5 метр оралиқ масофа сақлаш лозим.

Мунтазам экранга тикилманг
Бир қарашда бу ишни кун бўйи қилса бўладигандек. Яхшиси керак эмас, айниқса, мунтазам коронавирус ҳақида янгиликлар ўқиётган бўлсангиз. Тез-тез танаффус қилиб, гаджетлардан уйқуга ётишдан икки соат олдин воз кечинг ва уйғонишингиз билан уни қўлга олмасликка ҳаракат қилинг.

Тинчланинг
Турли кераксиз фикрлардан қутулиш учун, албатта, ўн йиллик тажрибага эга ёгачи ёки медитация устаси бўлиш шарт эмас. Уйдаги энг тинч жойни топиб ўтириб, ҳеч нарса ҳақида ўйламанг (айниқса, «К» ҳарфидан бошланадиган сўз ҳақида).

Одамлар билан мулоқот қилинг
Тўғри, ҳозир ташқарига чиқиб, дўстлар билан кўришишнинг иложи йўқ. Бироқ замонавий технологиялар ёрдамида доимо алоқада бўлиш имкони мавжуд. Видеочат ва конференциялар, телефон орқали мулоқотлар — ижтимоийлашиш ҳақида гап кетганда барча усуллар яхши.

Имкони бор нарсани назорат қилиш керак
Инсон дунё миқёсида бўлаётган ҳодисаларга тўғридан-тўғри таъсир кўрсата олмайди. Бироқ айрим майда нарсаларни назорат остига олса бўлади:

• Қўлни тўғри ювиш — камида 20 сония;
  
• Қолни совун билан ювиш имкони бўлмаганда антисептикдан фойдаланиш керак;
  
• Зарурат бўлмаса юзга тегинманг;
  
• Касаллик белгилари бор инсонларга яқинлашманг;
  
• Мунтазам фойдаланиладиган юзаларни дезинфекция қилиб туриш керак, хусусан, компьютер клавиатураси ва телефонни ҳам;
  
• Ўзингизни ёмон ҳис қилсангиз, уйдан чиқманг.

“Замин” янгиликларини “Facebook”да кузатиб боринг