11:00 / 14.09.2024

Ўзбекистон 18 давлат билан ЖСТга аъзо бўлиш бўйича музокараларни якунлади

^{Фото: LinkedIn / Azizbek Urunov}
Ўзбекистон 18 давлат билан ЖСТга аъзо бўлиш бўйича музокараларни якунлади. Бу ҳақда Ўзбекистон президентининг ЖСТ масалалари бўйича махсус вакили Азизбек Урунов Gazeta.uz’га маълумот берди.

13 сентябр куни Аргентина билан музокаралар ўз якунига етган. 18 давлатдан 14 таси билан бозорга кириш бўйича музокараларни якунлаш тўғрисидаги протоколлар имзоланган (протокол имзолангач жараён расман якунига етган бўлади). Бу мамлакатлардан иккитаси Бразилия ва Шри-Ланка ҳисобланади.

ЖСТ жамоатчилик форуми доирасида Ўзбекистон бош вазири ўринбосари Жамшид Хўжаев, ЖСТ бош директори ўринбосари Сянчэн Чжан ва бош директорнинг собиқ ўринбосари Алан Волф иштирокида ҳужжатларни имзолаш маросимлари бўлиб ўтди. Саида Мирзиёева бошчилигидаги Ўзбекистон делегацияси Женевада бўлиб ўтаётган ЖСТ 2024 жамоат форумида иштирок этмоқда.