Биткоин яна чўққига чиқди: янги рекорд қайд этилди

Дунёдаги энг машҳур криптовалюта — Биткоин яна иқтисодий сарҳадларни ортда қолдирди. 13 июль куни у $119 мингдан ошиб, тарихдаги энг юқори баҳосини қайд этди.

Binance платформаси маълумотларига кўра, Биткоиннинг қиймати $119 216 гача кўтарилган. Кейинроқ нарх бироз пасайган бўлса-да, у $118 минг атрофида барқарорлашди ва ишончли савдо диапазонини сақлаб қолди.

Сўнгги бир ой ичида криптовалютанинг умумий ўсиш суръати 12,9 %ни ташкил қилди. Молия бозори таҳлилчилари бу ҳолатни қатор омиллар билан боғламоқда.

Жумладан, АҚШ президенти Дональд Трампнинг криптобозорни қўллаб-қувватлашга доир баёнотлари ҳамда глобал миқёсда криптовалюталарга бўлган қизиқишнинг кучайиши асосий туртки бўлган. Бундан ташқари, айрим мамлакатлардаги регуляторлар томонидан тақдим этилган енгилликлар ҳам бозорга ижобий таъсир кўрсатмоқда.

Эътиборлиси шундаки, Биткоин ўсишда давом этаётган бир пайтда, бошқа кўплаб криптовалюталар, хусусан, Ethereum ва Solana каби токенлар, йил бошидан буён 30–50% атрофида қиймат йўқотган.

Бозор таҳлилчилари фикрича, Биткоиннинг ушбу кескин юқорилаш тенденцияси, унга бўлган талабнинг институционал даражада ўсиши ва глобал макроиқтисодий беқарорлик туфайли яна бир муддат давом этиши мумкин. «Замин»ни Telegram’да ўқинг!