Энг қадрсизланган валюта маълум қилинди

^{Фото: Reuters}
Турк лираси ноябрда долларга нисбатан энг қадрсизлашган валюта бўлди. Бундай маълумотни SberCIB Investment Research таҳлилий жамоасининг валюталар бозори ва фоиз ставкалари бўйича мутахассиси Юрий Попов келтириб ўтди.

Лира ноябр ойи давомида долларга нисбатан 29 фоизга қадрсизлашган. Россия рубли бир ой ичида долларга нисбатан 4 фоиз, ривожланган ва ривожланаётган бошқа давлатлар валюталари 1-3 фоизга қадрсизлашган. Мисол учун, евро долларга нисбатан 2 фоизга, Британия фунт стерлинги эса 3 фоизга арзонлашган.

Поповнинг фикрича, рубль арзонлашишига иккита омил: геосиёсий кескинлик ва АҚШ Федерал захира тизими пул-кредит сиёсатини қатъийлаштириши кутилаётгани сабабли долларнинг кучайиши, бундан ташқари, коронавируснинг янги штамми тарқалиши ҳақидаги хабарлар ҳам салбий таъсир кўрсатган.

Аввалроқ Fitch халқаро рейтинг агентлиги Туркия рейтингини “барқарор”дан “салбий”гача пасайтирди. Экспертларнинг фикрича, Туркияда инфляция йил охиригача 25 фоизга етади ва баҳоланувчи давлатлар орасида энг юқориларидан бири бўлиб қолади. 2022-2023 йилда мамлакатда инфляция 20 фоиз атрофида бўлади. Fitch прогнозига кўра, Туркиянинг давлат қарзи ялпи ички маҳсулотнинг 47 фоизигача ўсади.

Туркияда инфляция ноябрда охирги 3 йил ичида энг юқори кўрсаткични ташкил қилиб, 21 фоиздан ошди. Турк лираси бир йил ичида ўз қийматининг ярмини йўқотган. Охирги маълумотларга кўра, лира курси бир долларга 13,89гача тушиб кетган ва бу янги антирекорд ҳисобланади.

Турк миллий валютаси Туркия марказий банки мамлакатда рекорд даражада инфляция бўлишига қарамай, таянч фоиз ставкасини 16 фоиздан 15 фоизгача туширгандан кейин кескин қадрсизланди. Кейинроқ Туркия президенти Ражаб Тоййиб Эрдўған таянч ставкаси янада пасайтирилишини айтган.

Ўзбек сўми ҳам ноябр ойи давомида долларга нисбатан 1 фоиздан кўпроққа арзонлашди. Маълумотларга кўра, ой бошида бир доллар Марказий банк курси бўйича 10674 сўм турган бўлса, ой охирида бу кўрсаткич 10787 сўмни ташкил қилган. 3 декабрдаги охирги маълумотларга кўра, бир доллар 10760 сўмни ташкил қилмоқда. “Замин” янгиликларини “Инстаграм”да кузатиб боринг