Фойдаланиши тақиқланган мол-мулклар йўқ қилинди

Бюронинг Сирдарё вилоят бошқармасининг туман-шахар бўлимлари томонидан Ўзбекистон Республикаси Вазирлар Махкамасининг 15.07.2009 йилдаги 200-сонли қарори билан тасдиқланган “Давлат даромадига ўтказиладиган мол-мулкни олиб қўйиш, сотиш ёки йўқ қилиб ташлаш тартиби тўғрисида”ги Низом талаблари асосида жиноят ишлари бўйича туман-шаҳар судларининг иш юритувидаги мол-мулкларнинг йўқ қилишга оид ижро ҳужжатлари ижроси таъминлаб келинмоқда.

Хусусан, 2022 йилнинг 18 май куни Бюронинг Гулистон шахар бўлими иш юритувидаги 12 та ижро ҳужжатлари ижроси юзасидан тегишли идоралар вакиллари иштирокида ноқонуний муомалада бўлган, фойдаланиши тақиқланган ва яроқлилик муддати ўтган 24 турдаги 61.056.000 сўмлик тиббий дори-воситалари, 6 турдаги 492.000 сўмлик алкогол маҳсулотлари, 2 турдаги диний мазмундаги китоблар ва 2 турдаги психотроп таблеткалар Гулистон шахар 1-сонли чиқинди полигонида ёқиш йўли билан йўқ қилиниши таъминланди.

Тадбирда Сирдарё вилояти Санитария-эпидемиологик осойишталик ва жамоат саломатлиги хизмати, вилоят экология ва атроф муҳитни мухофаза қилиш бошқармаси ҳамда мол-мулкни сақлашга маъсул бўлган ташкилотлар вакиллари иштирок этишди.

Бюронинг Сирдарё вилоят бошқармаси органлари томонидан 2022 йилнинг 5 ойида қайд қилинган Низом талаблари ижроси юзасидан иш юритувдаги жами 231 та ижро ҳужжатлари ижроси тамомланган, шундан мол-мулкларни йўқ қилишга оид 127 та ижро ҳужжатлари ижроси амалда таъминланган.