Халқаро террорчилик ташкилоти ғояларини тарғиб қилган аёл 5 йилга озодликдан маҳрум қилинди

^{Фото: Тошкент шаҳар ИИББ}
Ўзбекистон ҳудудида халқаро террорчилик ташкилотининг ғояларини тарғиб қилиб келган шахсга суд ҳукми ўқилди, дея хабар бермоқда Тошкент шаҳар ИИББ.

Маълум қилинишича, 1990 йилда туғилган Н.С. 2020 йилда Сурия ва Туркияда фаолият юритаётган «Тавҳид ва жиҳод катибаси» халқаро террорчилик гуруҳи аъзолари билан интернет тармоғи орқали алоқа ўрнатиб, уларнинг таъсирида Туркияга борган. Сўнгра жангарилар сафига қўшилиш мақсадида Сурия ҳудудига ўтишга уринган вақтда Туркия чегарачилари томонидан қўлга олинган ва Ўзбекистонга қайтарилган эди.

Бироқ Н.С. яшаш манзилига қайтиб келганидан кейин ҳам жиноий фаолиятини давом эттириб, интернет орқали «Тавҳид ва жиҳод катибаси» террорчилари билан алоқани қайта тиклаган, уларнинг ғояларини қўллаб келган ҳамда ўз яқинлари орасида ва ижтимоий тармоқлар орқали экстремистик ғоялар тарғиботи билан шуғулланган.

Юқорида қайд этилган ҳолатлар юзасидан фуқаро Н.С.га нисбатан Жиноят кодексининг 244-1-моддаси (оммавий тартибсизликларга ва фуқароларга нисбатан зўравонлик қилишга омма олдида даъват қилиш) билан жиноят иши қўзғатилган.

Тергов жараёнида Н.С.га нисбатан инсонпарварлик тамойили асосида тилхат эҳтиёт чораси қўлланилган. Бироқ Н.С. бу сафар ҳам ўзига тўғри хулоса чиқармасдан Суриядаги ҳамфикрлари сафига қўшилиш мақсадида Ўзбекистон ҳудудидан яширинча чиқиб кетишга уринганида ҳуқуқ-тартибот идоралари томонидан қўлга олинди.

Бир неча маротаба имкон берилган бўлса-да, тўғри хулоса чиқара олмаган Н.С.га нисбатан суд ҳукми билан 5 йилга озодликдан маҳрум қилиш жазоси тайинланди. “Замин” янгиликларини “Telegram”да кузатиб боринг