Қорақалпоғистонда вояга етмаган икки маҳбус катта ёшли маҳбуслар билан бир камерада сақланаётгани аниқланди

^{Фото: Болалар омбудсмани матбуот хизмати}
Болалар омбудсмани томонидан Қорақалпоғистон Республикасида ўтказилган мониторинг давомида 2-сонли тергов ҳибсхонасида сақланаётган 2 нафар вояга етмаган Х.Х. ва Р.Т.лар шароитлари кўздан кечирилди ва улар билан алоҳида суҳбатлашилди. Бу ҳақда Болалар омбудсмани матбуот хизмати хабар берди.

Маълум қилинишича, мониторинг давомида мазкур вояга етмаганлар катта ёшли маҳбуслар билан бир камерада сақланаётгани аниқланди.

Халқаро стандартлар ва миллий қонунчиликка кўра, ҳибсхоналарда вояга етмаганлар катталардан ажратилган тарзда сақланиши шарт бўлиб, алоҳида ҳоллардагина бунга прокурор розилиги билан йўл қўйилади.

Болалар омбудсмани мониторинг доирасида аниқлаган ушбу қонун бузилиши юзасидан йўллаган алоҳида сўрови асосида ҳибсхонадаги мазкур ҳолат Бош прокуратура томонидан ўрганилди.

Ўрганишда аниқланишича, тергов ҳибсхонаси маъмуриятининг мутасадди мансабдор шахслари томонидан прокурор розилигини олмасдан туриб, вояга етмаганлар катта ёшли шахслар билан бир камерада сақлангани учун бу қонун бузилишига йўл қўйганларга қаттиқ ҳайфсан интизомий жазоси қўлланди.

Текширувда катта ёшли маҳбуслар томонидан вояга етмаганлар ҳуқуқларига зарар етказиш фактлари аниқланмай, айни пайтда вояга етмаганлар катта ёшли шахслардан алоҳида камерага жойлаштирилган бўлиб, ҳибсхона маъмурияти қонун талабларига қатъий риоя қилиши Қорақалпоғистон Республикаси прокуратураси томонидан алоҳида назоратга олинган. “Замин” янгиликларини “Инстаграм”да кузатиб боринг