Тошкентда она томонидан калтакланган 4 ёшли қизча вафот этди

Тошкент вилоятининг Бўстонлиқ туманида она томонидан калтакланган 4 ёшли қизалоқ вафот этди, деб хабар берди "Газета.uz".

23-декабр куни Бўстонлиқ туманидаги тиббиёт бирлашмасига турли жароҳатлари билан етказилган Й.М. исмли қизчани 47 ёшли онаси Э.Й. томонидан шафқатсиз калтаклангани аниқланди. Қизчанинг бош мияси қаттиқ шикастланган, ёпиқ бош жароҳатлари ва бошқа оғир тан жароҳатлари қайд этилган.

27-декабрда Чирчиқ шаҳар ИИБ томонидан она устидан Жиноят кодексининг 126-1-моддаси 7-қисми “б” банди бўйича (Вояга етмаганларга нисбатан уй шароитида қасддан оғир тан жароҳати етказиш) жиноят иши қўзғатилди.

Шифокорларнинг икки ҳафталик саъй-ҳаракатларига қарамай, қизалоқ 7-январ куни вафот этди. Натижада жиноят ишини қайта малакалаш режалаштирилмоқда, дея маълум қилди болалар омбудсмани матбуот хизмати. Ушбу ўзгариш жиноятга нисбатан қаттиқроқ жазо тайинланишини кўзда тутади.

Эслатиб ўтамиз, 2024-йил октябридан бошлаб Ўзбекистонда болаларни уй зўравонлигидан ҳимоя қилиш бўйича янги қонунлар кучга кирган эди.