Ўзбекистонда машина ўғирланиши ҳолатлари ортиб бормоқда: ҳайдовчиларга қандай чоралар тавсия этилмоқда?

Ўзбекистонда машина ўғирлаш ҳолатлари кўпайиши муносабати билан Йўл ҳаракати хавфсизлиги бош бошқармаси (ЙҲХББ) ҳайдовчилар ўртасида профилактика тадбирларини олиб бормоқда. Ушбу тадбирлар доирасида ҳайдовчиларга транспорт воситаларини ҳимоя қилиш бўйича чоралар ҳақида маълумот берилмоқда.

Замонавий машиналар кўп ҳолларда сигнализация ва двигатель блокировкаси каби хавфсизлик тизимлари билан жиҳозланган. Бироқ мутахассисларнинг таъкидлашича, кўпгина ҳайдовчилар ушбу тизимларни ишлатмайди, бу эса машина ўғирловчилар учун имконият яратади. Ҳатто оддий сигнализация ҳам ўғрилар учун жиддий тўсиқ бўлиши мумкин.

ЙҲХББ ҳайдовчиларга қўшимча эҳтиёт чораларига амал қилишни тавсия этмоқда:

• Машинани ёруғлик яхши тушадиган, видеокузатув камералари ҳудуди ёки қўриқланадиган майдонларда қўйинг.
  
• Автомобил ичида ҳужжатлар, пуллар, телефонлар ва бошқа қимматбаҳо буюмларни қолдирманг, чунки улар жиноятчилар эътиборини тортиши мумкин.
  
• Машинани ташлаб кетишдан олдин эшиклар ва ойналарнинг яхши ёпилганига ишонч ҳосил қилинг.
  
• Агар машиналар яқинида шубҳали шахсларни кўрсангиз, бу ҳақда зудлик билан ҳуқуқни муҳофаза қилиш органларига хабар беринг.
  

Ушбу тавсияларга амал қилиш машина ўғирланиши хавфини камайтиради ва мол-мулкингизни сақлаб қолишга ёрдам беради. ЙҲХББ фуқароларни ўз транспорт воситалари хавфсизлигига эътиборли бўлишга чақиради. “Замин” янгиликларини “Telegram”да кузатиб боринг