Ўқотар қуролни ихтиёрий топширганларга мукофот пули тўланади

Вазирлар Маҳкамаси қарори билан «Рўйхатга олинмаган ўқотар қурол ва унинг ўқ-дориларини, портловчи материаллар ва портлатиш қурилмаларини ички ишлар органларига ўз ихтиёри билан топшириш ҳамда ўқотар қурол ва унинг ўқ-дориларини топширганлик учун тақдирлаш тартиби тўғрисидаги низомни тасдиқлаш ҳақида»ги низомга ўзгартириш ва қўшимчалар киритилди.

Қурол ва унинг ўқ-дориларини топширишнинг қуйидаги тартиби белгиланмоқда:

• жисмоний шахс ички ишлар органига ёки профилактика инспекторига мурожаат қилади ва қуролни ва (ёки) унинг ўқ-дориларини топширади;
  
• шу куннинг ўзида ички ишлар органи қуролни (ўқ-дориларни) қабул қилиб олади ва қурол (ўқ-дорилар) ҳисобини юритиш учун квитанция расмийлаштиради;
  
• шундан сўнг ички ишлар органларининг масъул бўлинмалари томонидан тегишли текширувлар (терговга қадар текширув, баллистик экспертиза, базалар бўйича текширув) ўтказилади;
  
• тегишли комиссия аризачини тақдирлаш тўғрисида қарор қабул қилади.
  

Қурол ёки ўқ-дориларни ихтиёрий топширганлик учун БҲМнинг 5 дан 500 фоизигача миқдорда мукофот кўзда тутилган, хусусан:

• сойли стволли ўқотар қуролнинг, комбинацияланган (сойли стволли ва силлиқ стволли) ўқотар қурол учун – БҲМнинг 500 фоизи;
  
• силлиқ стволли ўқотар қурол учун– БҲМнинг 400 фоизи;
  
• стволсиз ўқотар қурол (патрон гильзаси ствол сифатида фойдаланиладиган қурол) учун – БҲМнинг 300 фоизи;
  
• пневматик қурол учун – БҲМнинг 100 фоизи;
  
• тиғли совуқ қурол (рапиралар, шпагалар ва қиличлар)нинг, улоқтириш қуроли (камонлар, арбалетлар ва найзалар)учун – БҲМнинг 50 фоизи;
  
• электрошок қурилмалари, учқун чиқаргичлар ва шикаст етказувчи таъсири электр энергиясидан фойдаланишга асосланган бошқа қурилмалари учун– БҲМнинг 30 фоизи;
  
• сигнал берувчи қурол учун – БҲМнинг 25 фоизи;
  
• газли қурол (кўздан ёш оқизадиган ёки ачиштирадиган моддалар билан тўлдирилган газли баллончалар, механик пуркагичлар, аэрозолли қурилмалар ва бошқа қурилмалар) учун – БҲМнинг 15 фоизи;
  
• патрон учун – БҲМнинг 5 фоизи;
  
• ствол, затвор, ўқдон (барабан), рамка, ствол қутиси учун – БҲМнинг 75 фоизи.
  

Агар қурол шикастланган бўлса, мукофот миқдори икки баравар камаяди.

Фото: Экология ва атроф-муҳитни муҳофаза қилиш қўмитаси “Замин” янгиликларини “Telegram”да кузатиб боринг