Тошкент аэропортида юкдан ўқ-дорилар топилди

Тошкент халқаро аэропортида Нью-Йоркдан келган йўловчининг юкида отиш қуроллари учун мўлжалланган патронлар топилди, деб Upl.uz хабар берди.

Инцидент «Тошкент-Аэро» махсус божхона мажмуасида юк рентген ускунаси орқали текширилаётган пайтда юз берган. Стандарт текширув пайтида шубҳали буюмлар кўриниб, божхона ходимлари янада батафсил текширишга қарор қилишган.

Мутахассислар жалб этилган ҳолда чемодан очилиб кўрилганда, шахсий буюмлар — кийимлар орасида 7,6×39 мм калибрдаги учта патрон топилган. Ушбу патронлар отиш қуролларида ишлатиш учун мўлжалланган.

Патронлар аниқлангач, маълумот ҳуқуқни муҳофаза қилиш органларига юборилди ва ҳозирда тергов ишлари бошланган.

Пассажир бу патронларни қандай олиб киргани ва мақсади аниқланмоқда. Унинг шахси ошкор этилмаган, лекин у АҚШдан келгани маълум. Божхона хизматчилари бу каби ҳолатлар қатъий назорат талаб қилишини таъкидлашди.

Ўзбекистон қонунчилигида қурол ва ўқ-дориларни олиб кириш учун махсус рухсатнома кераклиги белгиланган. «Замин»ни Telegram’да ўқинг!