Сергей Лавров расмий ташриф билан Самарқандга келди: қандай масалалар муҳокама қилинади?

Россия ташқи ишлар вазири Сергей Лавров расмий ташриф билан Самарқанд шаҳрига келди. Бу ҳақда Ўзбекистон ташқи ишлар вазирлиги матбуот котиби маълум қилди.

Ташриф доирасида икки мамлакат ташқи сиёсат идоралари раҳбарлари ўртасида музокаралар ва мулоқотлар бўлиб ўтиши кутилмоқда. Учрашувларда Ўзбекистон ва Россия ўртасидаги ҳамкорликнинг энг муҳим масалалари муҳокама қилинади.

«Коммерсант» нашрининг хабар беришича, Сергей Лавров ташриф давомида Ўзбекистон президенти Шавкат Мирзиёев билан ҳам учрашув ўтказади.

«Томонлар ўртасида бўлиб ўтадиган суҳбатларда асосий эътибор ҳозирги кунда дунёда шаклланган мураккаб геосиёсий вазиятда ташқи сиёсий ҳамкорликни янада чуқурлаштиришга қаратилади», — дейилади хабарда.

Шунингдек, икки давлат раҳбарлари — Шавкат Мирзиёев ва Владимир Путин ўртасида 2024 йил май ойида бўлиб ўтган давлат ташрифи доирасида эришилган келишувларни амалга ошириш ва Ўзбекистон-Россия ўртасидаги ҳар томонлама стратегик шериклик муносабатларини ривожлантириш масалалари ҳам муҳокама қилинади.

Ўзбекистон ва Россия ташқи сиёсий муносабатларидаги бу муҳим ташриф икки давлат ўртасидаги ҳамкорликни янада мустаҳкамлаш ва ривожлантиришда муҳим аҳамият касб этади.