Севара Назархон Қўқон хони Худоёрхоннинг 8-авлоди эканини билармидингиз?

Ўзбек эстрадасида ёрқин овозга эга бўлган, нафақат Ўзбекистон, балки хорижда ҳам ўз ижоди билан мухлисларнинг меҳрини қозонган хонанда Севара Назархоннинг келиб чиқиши ҳақида қизиқарли маълумот пайдо бўлди. Маълум бўлишича, у Қўқон хонлиги тарихида муҳим из қолдирган Худоёрхоннинг саккизинчи авлоди ҳисобланар экан.

Севара Назархон бу ҳақда "PopCast" подкастида берган интервьюсида биринчи марта очиқ маълум қилди. Суҳбат давомида «Сиз охирги хоннинг саккизинчи авлоди экансизми?» деган саволга Севара табассум билан: «Ҳа-ҳа, бу ҳақиқат!» деб тасдиқлади.

Тарихий манбаларга назар ташлайдиган бўлсак, Худоёрхон Қўқон хонлиги тахтига 1845 йилда 16 ёшида ўтирган. Унинг ҳукмронлигида Қўқон хонлиги турли сиёсий тўфонларни бошдан кечирган бўлса-да, тарихда унинг номи Қўқоннинг машҳур "Худоёрхон ўрдаси" орқали ҳам танилган.

Худоёрхон Қўқон хонлигида энг кўп муддат ҳукмронлик қилган шахс бўлиб, у тахтга бир неча марта қайтиб келган ва хонликнинг оғир кунларида унинг сиёсий ҳаёти ҳам кўплаб драматик воқеаларга тўла бўлган.

Севара Назархоннинг Худоёрхонга боғлиқлиги, унинг ўзбек халқининг бой маданияти ва тарихига янада кўпроқ эътибор қаратишига сабаб бўлганини айтиш мумкин. Хонанданинг мухлислари учун бу маълумот қизиқарли ва бир вақтнинг ўзида ғурур уйғотувчи янгилик бўлди.

Ўзбекистонда хизмат кўрсатган артист, анъанавий ўзбек мусиқасини замонавий услублар билан уйғунлаштирган хонанда Севара Назархоннинг тарихий шахсга боғлиқ эканлиги унинг шахсияти ва ижодини янада бойитишга хизмат қилса ажаб эмас.

Бу маълумот мухлислар ўртасида ижтимоий тармоқларда катта муҳокамаларга сабаб бўлди ва Севара Назархоннинг мухлислари унинг ижодини янада катта қизиқиш ва меҳр билан кузатишда давом этмоқда.