Тошкентдаги хусусий мактабда ўқувчига нисбатан мажбурий соч олиш ҳолати кузатилди

4 май куни ижтимоий тармоқларда Тошкентдаги хусусий мактабда 7-синф ўқувчисининг сочи мажбуран кал қилиб олингани ҳақида хабар тарқалди, деб Nova24.uz хабар берди. Тошкент шаҳар Мактабгача ва мактаб таълими бошқармаси ушбу ҳолат юзасидан изоҳ берди.

Маълумотларга кўра, воқеа 2025 йил 28 апрель куни Sharjah School хусусий мактабида содир бўлган. Мактаб маъмурияти 7-синф ўқувчисига сочи узунлиги учун танбеҳ берган. 27 апрель куни ўқувчининг ота-онаси мактабга чақирилиб, улар билан суҳбат ўтказилган.

Ота-оналар фарзандларининг сочини қисқартиришга ваъда беришган. Эртаси куни ўқувчи мактабга сочининг ён томонлари олинган ҳолда келган. Мактаб директори буни етарли деб ҳисобламай, тхэквондо мураббийига ўқувчининг сочини кал қилиб олишни буюрган.

29 апрель куни ўқувчининг ота-оналари мактабга расмий шикоят аризаси билан мурожаат қилишган. Шу куни мактаб директори, тхэквондо мураббийи ва мактаб психологи ўқувчининг уйига бориб, ота-оналардан узр сўрашган. Психолог ўқувчи билан суҳбат ўтказган. Ҳозирда ҳуқуқни муҳофаза қилувчи органлар томонидан тергов ишлари олиб борилмоқда. «Замин»ни Telegram’да ўқинг!