Аёл ўлими билан тугаган муҳаббат – суд ҳукми чиқди

Бухоро вилоятида 25 ёшли эркак уйқудаги севган аёлини болиш билан бўғиб ўлдирди ва жасадини подвалга ташлаб қочиб кетди, деб Nova24.uz хабар берди.

Маълумотларга кўра, эркак бошқа аёл билан никоҳда бўлган ҳолда, турмушдан ажрашган аёл билан яқин муносабатда бўлган. Улар ҳатто биргаликда хорижда дам олишган.

Аёл унинг ҳозирги хотинидан ажрашишини талаб қилган ва шу орқали тортишув келиб чиққан. Рашк ва босим туфайли эркак аёлни уйқуда бўлган пайтида бўғиб ўлдирган ва жасадини подвалга ташлаб қочган.

Аёл яқинлари уни 10 кун давомида излашган ва кейин ҳуқуқ-тартибот органларига мурожаат қилишган. Эркак қўлга олингач, қилмишини тан олган. У Ўзбекистон Жиноят кодексининг 97-моддаси 1-қисми (Касддан одам ўлдириш) бўйича 11 йил озодликдан маҳрум қилиш жазосига ҳукм қилинди. «Замин»ни Telegram’да ўқинг!