Санкт-Петербургда аёлни ўлдирган бухоролик 11 йилга қамалди

Санкт-Петербургда фуқарони ўлдирган Бухоро вилоятининг Вабкент туманида яшовчи 25 ёшли М.А. жинояти учун 11 йил озодликдан маҳрум этилди, деб хабар берди UPL.uz.

Ўзбекистон Олий суди матбуот хизмати маълум қилишича, Невский туманидаги кўп қаватли уйнинг подвалида 32 ёшли ўзбекистонлик аёл **М.Р.**нинг жасади топилган. Текширув натижасига кўра, уни унга турмуш қуришни талаб қилган севгани — М.А. ўлдирган.

Маълумотларга кўра, М.А. ва М.Р. 2022 йилдан бери муносабатда бўлишган. М.Р. икки фарзанднинг онаси бўлиб, ажрашган аёл бўлган. М.А. ишлаш мақсадида Санкт-Петербургга кетган, орқасидан М.Р. ҳам у ерга бориб, улар 20 кун бирга яшаган. Биринчи жанжалдан сўнг аёл Москвага кетган, кейинроқ қайта келган ва иккинчи марта жанжал юз берган — сабаб эса М.Р. ундан расмий аёли билан ажрашишни талаб қилгани бўлган.

М.А. жанжал пайтида аёлни ерга йиқитиб, унинг нафас йўлини тўсиб қўйган, натижада аёл вафот этган. Жиноятини яшириш мақсадида жасадни чемоданга солиб, кўп қаватли уйнинг подвалидаги чуқурга кўмган. Шунингдек, аёлнинг телефонидан WhatsApp орқали яқинларига "мен 10 кунга йўқ бўлиб тураман" мазмунида хабар жўнатган.

Кейинроқ у Ўзбекистонга қайтган ва 10 кундан сўнг маҳалла профилактикачи инспектори уни суҳбатга чақирган. Жиноятни яширолмаслигини англаган эркак ўз қилмишига иқрор бўлган.

Ўзбекистон ва Россия ҳуқуқни муҳофаза қилувчи органлари ҳамкорлигида тергов ишлари ўтказилган. Шунингдек, у аёл номига 50 миллион сўмлик кредит ҳам расмийлаштиргани аниқланган.

Суд ҳукмига кўра, М.А. “Қасддан одам ўлдириш” моддаси билан айбли деб топилиб, умумий режимдаги колонияда 11 йил озодликдан маҳрум этилди.