Жиззах вилоятининг Пахтакор туманида жуда афсусли йўл-транспорт ҳодисаси рўй берди. Ҳодиса туман марказидаги “Тожмахал” тўйхонаси қаршисида содир бўлган. Унда “Дамас” русумли автомобил иштирок этган.
Ҳодисанинг дастлабки маълумотларига кўра, йўлни кесиб ўтаётган ёш бола “Дамас” автомобили томонидан уриб юборилган. Тўсатдан юз берган тўқнашув натижасида автомашина мувозанатни йўқотиб, ағдарилиб кетган. Гувоҳлар сўзларига кўра, у бир неча марта юмалаб тушган.
Айни пайтда жабрланган бола ва ҳайдовчининг соғлиги ҳолати ҳақида расмий маълумот берилмаган. Ҳодиса юзасидан тегишли идоралар томонидан суриштирув ишлари олиб борилмоқда. Ҳодиса жойига шошилинч тиббий ёрдам ҳамда ҳуқуқ-тартибот органлари ходимлари етиб келган.
Фуқаролар хавфсизлиги ва йўлларда ҳаракатланиш маданияти яна бир бор муҳокама марказига чиқмоқда. Ҳодисани муҳокама қилаётганлар бу каби воқеаларга болаларнинг назоратсиз қолиши, ҳайдовчиларнинг тезлик қоидаларига риоя қилмаслиги ва йўл белгиларига эътиборсизлик сабаб бўлаётганини таъкидлашмоқда.
Мутасадди идоралар томонидан расмий ахборот берилиши кутилмоқда. Болаларга ҳаракат хавфсизлиги асослари ҳақидаги билимларни кучайтириш, мактабларда тушунтириш ишларини фаоллаштириш лозимлиги яна бир бор ойдинлашмоқда.
ЙТҲ билан боғлиқ аниқ маълумотлар яқин кунларда маълум қилинади. Ижтимоий тармоқларда воқеа акс этган фото ва видеолар кенг муҳокама қилинмоқда.
«Замин»ни Telegram’да ўқинг!
