Ўзбекистонда биринчи марта инсоннинг 130 ёшга тўлгани расман тасдиқланди, деб Kursiv.uz хабар берди. Бу — Фарғона вилояти Бувайда туманида яшовчи Хувайдо Умарова (Тошматова). Янги расмий ҳужжатларига кўра, у 1895 йил 1 январда туғилган.
Ушбу ажабланарли ҳолат Адлия вазирлигининг “Ҳеч ким ҳужжатсиз қолмайди” акцияси доирасида аниқланган. Маҳаллий адлия бўлими ходимлари “Қорақум” маҳалласи аҳолисини ўрганар экан, Хувайдо Умарованинг туғилганлик гувоҳномаси умуман бўлмагани маълум бўлди.
Шундан сўнг, туманлараро суд сайёр йиғилиш ўтказиб, унинг туғилганлик фактини расман тан олди. Илгари оммавий ахборот воситаларида у ҳақида хабар берилган бўлса-да, ёши ҳеч қачон расман тасдиқланмаган эди. Энди эса Хувайдо Умарова — Ўзбекистонда, балки дунёдаги энг узоқ умр кўрган инсон сифатида эътироф этилди.
«Замин»ни Telegram’да ўқинг!
