Тошкент вилояти Янгийўл шаҳрида 9 сентябрь куни содир бўлган оммавий жанжал маҳаллий аҳоли ва ижтимоий тармоқ фойдаланувчилари эътиборини ўзига тортди. Бир гуруҳ шахсларнинг ўзаро муштлашаётгани видеога туширилган ва тез тарқатилди.
Ўзбекистон Республикаси Ички ишлар вазирлиги ушбу ҳолатни шу куни назоратга олиб, тезкор қидирув ва суриштирув тадбирларини олиб борди. Аниқланишича, соат тахминан 21:30 лар атрофида 29 ёшли фуқаро синфдошлари билан тўйхона ҳовлисида турган пайтда, унга таниш бўлган 1997 йилда туғилган Юнусов Сирожиддин Сафомуддин ўғли бошчилигидаги шахслар давлат рақами олиб ташланган автомобил билан кириб келишган.
Тарафлар орасида келиб чиққан низо туфайли, 29 ёшли фуқаро қўл ва оёқлари билан урилиб, турли тан жароҳатлари олди. Воқеа жойида олиб борилган тергов ва суриштирув тадбирлари натижасида муштлашув иштирокчилари қўлга олинди ва уларга нисбатан қонун доирасида “қамоққа олиш” тарзидаги эҳтиёт чоралари қўлланди.
Шунингдек, мазкур жиноятда гумон қилинаётган 2000 йилда туғилган Қоражонов Жавоҳир Джафер ўғли ва Нуралиев Асадбек Алишер ўғлига нисбатан қидирув эълон қилинди. Улар ҳозирда ушлаб олиниши учун махсус чора-тадбирлар амалга оширилмоқда.
Ҳодиса жойи ва иштирокчилар билан боғлиқ суриштирув ишлари давом этмоқда, маҳаллий аҳоли ва ҳуқуқни муҳофаза қилувчи органлар жанжаллардан сақланиш ва эҳтиёткорликни оширишга чақирилмоқда.
«Замин»ни Telegram’да ўқинг!
