Киев вилоятида мажбурий меҳнатга жалб қилинган 13 нафар ўзбекистонлик фуқаро қутқарилди, деб uz24.uz хабар берди. Ташқи ишлар вазирлиги уларнинг аҳволи назоратга олинганини ва Ватанга қайтариш учун чоралар кўрилаётганини маълум қилди.
Украина полициясига кўра, фуқароларни қул сифатида ишлатиш схемаси 51 ёшли хитойлик томонидан ташкил этилган. Жиноят иши доирасида яна икки нафар хитойлик, бир таиландлик аёл ва беш нафар украиналик гумонланувчи қўлга олинди. Ўзбекистонликларнинг паспортлари олиб қўйилгани ва улар ноқонуний равишда ушлаб турилгани айтилмоқда.
Қутқарилган шахслар шифохонага жойлаштирилиб, зарур тиббий ёрдам кўрсатилди. Элчихона Украина Ташқи ишлар вазирлиги ва Бош прокуратурасига ноталар йўллаб, консуллик ва ҳуқуқий ёрдамни таъминламоқда. Шу билан бирга, Ўзбекистон элчихонаси ҳозирча хавфсизлик нуқтаи назаридан фуқароларга Украинага сафар қилмасликни тавсия этмоқда.
«Замин»ни Telegram’да ўқинг!
