Ўзбекистонда ярим йилда 50 га яқин талабалар наркотик савдосида қўлга тушди, деб Uznews хабар берди.
Президент ҳузуридаги Наркотик моддалар устидан назорат миллий маркази маълумотига кўра, 2025 йилнинг дастлабки олти ойи ичида 46 нафар талабанинг наркотик савдосига алоқадорлиги аниқланган. Бу ҳақда марказ катта инспектори Мухаммадқодир Маҳмудов маълум қилди.
Унинг сўзларига кўра, охирги пайтларда жиноий гуруҳлар талабаларни наркотик ташувчи сифатида фаол жалб этмоқда. Олий таълим муассасаларига кирган ёшлар ноқонуний фаолиятга тортилаётгани кузатилмоқда.
Шунингдек, инспектор мамлакатда яширин нарколабораториялар сони ортиб бораётганини таъкидлади. Агар 2024 йил давомида 5 та бундай лаборатория аниқланган бўлса, 2025 йилнинг ярим йиллигидаёқ 8 та ҳолат қайд этилган.
Маҳмудовнинг айтишича, энди наркотиклар табиий маҳсулотларда эмас, балки ичимликлар, энергетиклар, кофе ва ширинликлар каби маҳсулотларда ҳам учрамоқда. Ушбу моддаларни фақат бир марта истеъмол қилиш ҳам кучли боғлиқликка олиб келиши мумкин.
Инспекторнинг таъкидлашича, янги турдаги наркотиклар одамдаги ўзгаришни дарҳол намоён қилмайди. Шу боис кўплаб ота-оналар фарзандларидаги ўзгаришни яхши томонга деб ўйлайди, аслида эса бу иллатнинг дастлабки белгилари бўлади. Вақт ўтиши билан оғриқ, руҳий изтироб ва ҳатто суиқасд ҳолатлари ҳам учраётгани айтилди.
2025 йилда наркотик жиноятлар сони 2024 йилга нисбатан 23 фоизга ошган. Мухаммадқодир Маҳмудов фуқароларни, айниқса ота-оналарни, фарзандларига нисбатан эътиборли ва ҳушёр бўлишга чақирди.
“Zamin”ни Telegram'да ўқинг!
