Ҳукумат қарори билан “Ўзбекистонда аҳоли ва қишлоқ хўжалиги рўйхатга олишни тайёрлаш ва ўтказиш тартиби тўғрисидаги низом” тасдиқланди, деб ёзмоқда UzNews.uz сайти.
Низомга биноан, аҳолини рўйхатга олиш 2026 йил 15 январдан 28 февралга қадар ўтказилади. Расман бошланиш санаси 15 январь соат 00:00, жараённинг умумий муддати эса 45 кун этиб белгиланган.
Шахсий ва қишлоқ хўжалиги маълумотлари тўпланади, бироқ рўйхатга олиш санасидан кейинги ўзгаришлар ҳисобга олинмайди. Масалан, 2026 йил 15 январдан кейин туғилган болалар анкета шаклларига киритилмайди, аммо бу санадан кейин вафот этган шахслар ҳақидаги маълумотлар қайд этилади.
Қуйидаги тоифадаги шахслар ҳисобга олинмайди:
— мамлакатдан бир йилдан ортиқ чет элда бўлган Ўзбекистон фуқаролари;
— хорижий дипломатик ваколатхоналар, халқаро ташкилотлар ходимлари ва уларнинг оила аъзолари;
— халқаро шартномаларга биноан дипломатик имтиёзларга эга шахслар.
Ҳар бир фуқаро ўзининг доимий ёки вақтинчалик яшаш манзили бўйича ҳисобга олинади. Яшаш жойи деганда, инсон туну кунининг асосий қисмини ўтказадиган уй, квартира ёки бошқа бино тушунилади.
Эслатиб ўтамиз, аҳоли ва қишлоқ хўжалиги рўйхатга олиш тўғрисидаги Президент фармони 2025 йил сентябрь ойида имзоланган. Жараён “маҳаллий еттилик” тизими ходимлари томонидан планшетлар ёрдамида амалга оширилади.
“Zamin”ни Telegram'да ўқинг!
