Андижонда 18 дарахт ноқонуний кесиб юборилди

Андижонда 18 дарахт ноқонуний кесиб ташлангани аниқланди, деб UPL.uz хабар берди.

Андижон вилояти Экология, атроф-муҳитни муҳофаза қилиш ва иқлим ўзгариши вазирлиги матбуот хизматига кўра, Избоскан туманида 30 йиллик дарахтлар кесилгани ҳақидаги хабарлар ижтимоий тармоқларда тарқалганидан сўнг текширув ўтказилган.

Текширув учун махсус ишчи гуруҳ тузилиб, воқеа Избоскан туманидаги “Мирзо Улуғбек” МФЙда, Шифокорлар кўчасида содир бўлгани аниқланган. У ерда 18 та каталпа турига мансуб дарахт ноқонуний кесиб юборилгани маълум бўлган.

Фуқарога нисбатан Ўзбекистон Республикаси Маъмурий жавобгарлик тўғрисидаги кодекснинг “Дарахтлар ва буталарни ноқонуний кесиш” моддасининг 1-қисми бўйича баённома расмийлаштирилган. Унга 10 300 000 сўм миқдорида жарима белгиланган.

Вазирликнинг маълум қилишича, бу ноқонуний ҳаракатнинг атроф-муҳитга етказган моддий зарари миқдори ҳозирча аниқланмаган.

Нодирбек Раззоков

«ZAMIN.UZ» муҳаррири