Фарғона вилоятининг Марғилон шаҳрида рўй берган навбатдаги йўл-транспорт ҳодисаси жамоатчилик эътиборини тортди. Маълумотларга кўра, Nexia-1 русумли автомобил ҳайдовчиси пиёдалар йўлагидан кесиб ўтаётган 3 нафар мактаб ўқувчисини уриб юборган, деб хабар берди вилоят ЙҲХБ матбуот хизмати.
Ҳодиса кеча, 16 октябрь куни тахминан соат 12:30 ларда содир бўлган. 1998 йилда туғилган ҳайдовчи Марғилон шаҳридаги “Б.Марғилоний” кўчасида ҳаракатланиб кетаётган пайтда, 33-сонли умумтаълим мактаби олдида жойлашган пиёдалар ўтиш жойига яқинлашган. Шу заҳоти йўлни кесиб ўтаётган 3 нафар болани пайқамай, уларни уриб юборган.
Дастлабки маълумотларга кўра, ҳодиса натижасида бир нафар ўқувчи оғир жароҳат олиб, дарҳол шифохонага етказилган. Қолган икки нафарига эса жойида биринчи тиббий ёрдам кўрсатилган.
Ҳозирда воқеа юзасидан Марғилон шаҳар ички ишлар бўлими терговга қадар текширув ишларини бошлаган. Ҳодиса сабаблари, ҳайдовчининг айб даражаси ва ҳаракат хавфсизлиги қоидаларига риоя қилинмаган ҳолатлар ўрганилмоқда.
Йўл ҳаракати хавфсизлиги инспекторлари таъкидлашича, айни дамда пиёдалар, айниқса мактаб ёшидаги болаларнинг йўлдаги хатти-ҳаракатларига эътибор қаратиш муҳим. Ҳайдовчилар учун эса мактаблар олдидаги пиёдалар ўтиш жойларида тезликни пасайтириш — фақат қоида эмас, балки инсон ҳаётини сақлаб қолиш масъулияти ҳамдир.
“Zamin”ни Telegram'да ўқинг!
