Тақиқланган моддаларни ноқонуний олиб кириш тўхтатилди. Бу ҳақда Upl.uz хабар беради.
Ўзбекистон божхона органлари томонидан кучли таъсир қилувчи "сибутрамин" моддаси олиб кирилишининг олдини олишга қаратилган бир қатор тадбирлар ўтказилди. Хусусан, Тошкент шаҳридаги Ислом Каримов номидаги халқаро аэропортда "Истанбул-Тошкент" рейси йўловчиси "яшил" йўлак орқали умумий қиймати 33 миллион сўмлик, 2 000 қадоқдан иборат вазн йўқотиш учун мўлжалланган қаҳвани олиб ўтишга уринган.
Экспертиза натижаларига кўра, ушбу қаҳва таркибида "сибутрамин" моддаси аниқланган, аммо қадоқда бу ҳақда ҳеч қандай маълумот кўрсатилмаган. Шунингдек, "Фарғона" чегара божхона постида яна бир фуқаро қиймати 7,2 миллион сўмлик, 360 дона вазн йўқотиш учун қаҳвани олиб киришга уринган.
Ушбу маҳсулот таркибида ҳам "сибутрамин" моддаси аниқланган. Божхона қўмитаси маълумотига кўра, "сибутрамин" Ўзбекистонда алоҳида кучли таъсир қилувчи моддалар рўйхатига киритилган бўлиб, ҳатто 0,5 грамм миқдорида ушбу модданинг мавжудлиги жиноий жавобгарликка олиб келади.
Марказий божхона лабораторияси ҳозирга қадар таркибида "сибутрамин" ва "топентатол" каби кучли моддалар бўлган 39 хил савдо маркасини ноқонуний олиб кирилиш ҳолатларини аниқлаган. Жорий йил давомида мамлакатимиз божхона ходимлари томонидан 1,1 тонндан ортиқ психотроп ва кучли таъсир қилувчи моддаларни ноқонуний олиб ўтишнинг олди олинган.
Бу кўрсаткич ўтган йилнинг шу даврига нисбатан 3,6 баробар кўпдир.
Меҳмон гуруҳидаги фойдаланувчилар ушбу мақолага изоҳ қолдира олмайди.
