Қорақалпоғистон ва Тошкент шаҳрида ўтказилган тезкор тадбирлар давомида сохта АҚШ долларини сотишга уринган шахслар қўлга олинди. Бу ҳақда Бош прокуратура ҳузуридаги Департамент матбуот хизмати маълум қилди. Бу ҳақда podrobno.uz хабар беради.
Тошкентнинг Юнусобод туманида икки фуқаро 9,9 минг доллар кўринишидаги қалбаки банкнотларни учинчи шахсга 5 минг долларга сотмоқчи бўлган пайтда ушланган.
Қорақалпоғистоннинг Тўрткўл туманида эса яна бир фуқаро банк кассасида 700 доллар сохта купюрани алмаштиришга уринган ва шу жараёнда қўлга олинган.
Қалбаки валюталар ашёвий далил сифатида расмий тартибда олиб қўйилди. Ҳолатлар юзасидан жиноят ишлари қўзғатилиб, ҳозирда тергов ҳаракатлари олиб борилмоқда.
Департамент фуқароларни Ўзбекистонда ҳисоб-китобларда қонуний тўлов воситаси — миллий валютасидан фойдаланишга чақирди. Қайд этилишича, ҳатто шахс банкнот сохта эканини билмаган бўлса ҳам, уни муомалага киритишга уриниш жиноий жавобгарликка сабаб бўлади.
Аввалроқ пойтахтнинг Чилонзор туманида ҳам катта миқдордаги хорижий валютани сотиш билан боғлиқ ҳолатда фуқаро ушлангани хабар қилинганди.
“Zamin”ни Telegram'да ўқинг!
