Гиёҳвандлик воситаларининг ноқонуний айланмасига қарши кураш доирасида Андижон вилоятида навбатдаги тезкор тадбир ўтказилди. Давлат хавфсизлик хизматининг вилоят бўйича бошқармаси, Божхона ҳамда Ички ишлар органлари ўзаро ҳамкорликда Асака туманида махсус чора-тадбирларни амалга оширди.
Тадбир давомида 1988 йилда туғилган маҳаллий фуқаронинг ёнидан 1 дона номсиз спрей идишдаги номаълум суюқлик ҳамда 2 дона номсиз дори воситалари аниқланиб, вақтинча сақловга олинди. Ҳуқуқ-тартибот идоралари ҳолатни чуқурроқ текшириш учун тезкор ишларни давом эттирди.
Кейинги жараёнда Хўжаобод туманида мазкур шахсга тегишли хонадон кўздан кечирилганда, ушбу манзилда нарколаборатория ташкил этилгани маълум бўлди. Хонадондан спрей идишлардаги номсиз суюқликлар, оқ рангли кукунсимон моддалар, кучли таъсир қилувчи дори воситалари, шунингдек гиёҳвандлик моддаларини тайёрлашда қўлланиладиган турли анжомлар ашёвий далил сифатида олиб қўйилди.
Экспертиза хулосасига кўра, аниқланган моддалар “Альфа-PVP” синтетик гиёҳвандлик воситаси ҳамда “Тропикамид” кучли таъсир қилувчи моддаси экани тасдиқланди.
Ҳозирда мазкур шахсга нисбатан Ўзбекистон Республикаси Жиноят кодексининг 273-моддаси 5-қисми билан жиноят иши қўзғатилиб, унга нисбатан “қамоқ” эҳтиёт чораси қўлланилди. Тергов ҳаракатлари давом этмоқда.
Бундай ҳолатлар яна бир бор эслатади: синтетик гиёҳвандлик воситалари жамият учун ўта хавфли таҳдид. Ҳуқуқ-тартибот идоралари эса ноқонуний айланмага қарши чораларни кучайтириб, бундай схемаларга барвақт чек қўйишга қаратилган ишларни изчил давом эттирмоқда.
“Zamin”ни Telegram'да ўқинг!
