Андижонда тадбиркорни ёлланма қотил орқали ўлдирмоқчи бўлган бир гуруҳ шахслар ушланди. Бу ҳақда Андижон вилояти ИИБ ахборот хизмати хабар берди.
Маълум қилинишича, 2026 йилнинг 4 феврал куни якка тадбиркорлик билан шуғулланувчи шахс Андижон туман ИИБга ўзига нисбатан уюштирилаётган суиқасд бўйича ариза билан мурожаат қилган. У 5 нафар жиноятчидан иборат уюшган гуруҳ 1 500 доллар эвазига қотил ёллаб, уни қасддан ўлдиришни келишганини билдирган ҳамда ёрдам сўраган.
Шундан сўнг Пахтаобод тумани ҳудудида Андижон вилояти ИИБ, Давлат хавфсизлик хизмати ва вилоят прокуратураси ҳамкорлигида махсус тезкор тадбирлар ўтказилган. Жараёнда гуруҳ етакчиси, муқаддам Жиноят кодексининг 8 та моддаси билан судланган 42 ёшли “Роналдо” лақабли шахс экани аниқланган. У 2000 йилда туғилган, муқаддам 7 марта судланган ёлланма қотилга тадбиркорни қасддан ўлдириб бериш эвазига 1 500 доллар таклиф этиб, шундан 300 минг сўм берганда ушланган.
Тезкор тадбир давом эттирилиб, гуруҳнинг бошқа аъзолари – 1984 йилда туғилган Пахтаобод тумани тиббиёт бирлашмасининг “Главрач” лақабли бошлиғи, “Боксёр” лақабли 42 ёшли шахс, 1984 йилда туғилган фуқаро ҳамда 23 ёшли талаба қўлга олинган.
Ҳолат юзасидан гуруҳ аъзоларига нисбатан Жиноят кодексининг 25,97-моддаси 2-қисми “п” банди (бир гуруҳ шахслар ёки уюшган гуруҳ аъзоси томонидан ёхуд ўша гуруҳ манфаатларини кўзлаган ҳолда қасддан одам ўлдиришга суиқасд қилиш) билан жиноят иши очилган.
“Zamin”ни Telegram'да ўқинг!
